രാഷ്ട്രീയ കാമധേനു ആയോഗിന്റെ 'സൂപ്പർ ചാണകം'; ശാസ്ത്രജ്ഞർ ചോദ്യം ചെയ്യുന്നു

ന്യൂഡൽഹി: രാഷ്ട്രീയ കാമധേനു ആയോഗിന്റെ 'സൂപ്പർ ചാണക'ത്തെ ചോദ്യം ചെയ്ത് ശാസ്ത്രജ്ഞർ. ചാണകത്തിന് ആളുകളെ വികിരണങ്ങളിൽ നിന്ന് രക്ഷിക്കാൻ കഴിയുമെന്ന് പശുക്കളുടെ സംരക്ഷണ ചുമതലയുള്ള കേന്ദ്ര സർക്കാർ ഏജൻസിയായ രാഷ്ട്രീയ കാമധേനു ആയോഗ് കഴിഞ്ഞ ദിവസം അവകാശപ്പെട്ടിരുന്നു.

ശാസ്ത്രീയ വിവരങ്ങളിലൂടെ രാഷ്ട്രീയ കാമധേനു ആയോഗിന് അവകാശവാദങ്ങളെ പിന്തുണയ്ക്കാൻ കഴിയുന്നില്ലെങ്കിൽ, ഈ വാദം അന്ധവിശ്വാസവും കപട ശാസ്ത്രവും പ്രചരിപ്പിക്കുന്നതിനും ഭരണഘടനയുടെ ആർട്ടിക്കിൾ 51 എ (എച്ച്) ന്റെ ലംഘനത്തിനും തുല്യമാണെന്ന് ശാസ്ത്രജ്ഞർ പറഞ്ഞു.

വാർത്താ സമ്മേളനത്തിൽ ആർ‌കെ‌എ ചെയർമാൻ വല്ലഭായ് കതിരിയ ചാണകത്തെ ആളുകളെ വികിരണങ്ങളിൽ നിന്ന് രക്ഷിക്കുമെന്ന് അവകാശപ്പെട്ടിരുന്നു. ചാണകത്തിന് എല്ലാവരേയും സംരക്ഷിക്കാൻ കഴിയും. ഇത് ആന്റി റേഡിയേഷൻ ആണ്. ഇത് വികിരണത്തെ തടയുന്നു. വീട്ടിലെത്തിയാൽ, വീട് മുഴുവൻ പരിസ്ഥിതി സൗഹാർദ്ദപരവും വികിരണങ്ങളില്ലാത്തതുമായിരിക്കും. ശാസ്ത്രത്തിലൂടെ ഇത് തെളിയിക്കപ്പെട്ടിട്ടുണ്ടെന്നും കതിരിയ പറഞ്ഞു.

മൊബൈൽ ഫോണുകളിൽ നിന്നുള്ള വികിരണം കുറയ്ക്കുന്നതിന് ഉപയോഗിക്കാമെന്ന് അദ്ദേഹം അവകാശപ്പെടുന്ന ഒരു ഉപകരണവും അദ്ദേഹം ഉയർത്തിക്കാട്ടിയിരുന്നു. ചാണകത്തിന്റെ വികിരണവിരുദ്ധ സ്വഭാവ വിശേഷങ്ങൾ ഈ ഉപകരണത്തിൽ സ്ഥാപിച്ചതായി കതിരിയ അവകാശപ്പെട്ടിരുന്നു. ഉപകരണത്തിന്റെ ശാസ്ത്രീയ പരീക്ഷണങ്ങളെക്കുറിച്ചുള്ള വിശദമായ വിവരങ്ങൾ പങ്കുവെക്കാൻ ആർ‌കെ‌എയോട് ആവശ്യപ്പെടുന്ന ഒരു പൊതു പ്രസ്താവനയിൽ ഒന്നിലധികം അക്കാദമിക് സ്ഥാപനങ്ങളിൽ നിന്നുള്ള നൂറിലധികം ശാസ്ത്രജ്ഞർ ഒപ്പിട്ടു.

ഡാറ്റയും പരീക്ഷണാത്മക വിശദാംശങ്ങളും നൽകാൻ കഴിയുമോ? എന്ത് പരീക്ഷണമാണ് ഇതിനായി നടത്തിയിട്ടുള്ളത്?. വികിരണം അളക്കാൻ ഉപയോഗിച്ച ഉപകരണം ഏതാണ്?. ഏത് തരം വികിരണങ്ങളാണ് അളന്നത്?. ഏതൊക്കെ ഫോണുകൾ പരീക്ഷണത്തിൽ ഉപയോഗിച്ചു?, തുടങ്ങിയ ചോദ്യങ്ങളാണ് ശാസ്ത്രജ്ഞർ ഉന്നയിച്ചത്.

ഈ വിശദാംശങ്ങൾ പരസ്യമാക്കാൻ ശാസ്ത്രജ്ഞർ കതിരിയയോട് അഭ്യർത്ഥിച്ചു. നിങ്ങളുടെ അവകാശവാദങ്ങളെ പിന്തുണയ്ക്കുന്നതിന് നിങ്ങൾക്ക് സാധുവായ ഡാറ്റ ഇല്ലെങ്കിൽ, നിങ്ങളുടെ പത്രസമ്മേളനം അന്ധവിശ്വാസവും കപട ശാസ്ത്രവും പ്രചരിപ്പിക്കുന്നതിന് തുല്യമാണ്, അത് ഭരണഘടനയുടെ ആർട്ടിക്കിൾ 51 എ (എച്ച്) ന് വിരുദ്ധമാണെന്ന് അവർ പറഞ്ഞു.