മെയ് നാലുമുതല് കണ്ണൂരില് മടങ്ങിയെത്തിയത് 3500 ലേറെ പേര്; ദുബയില്നിന്ന് ആദ്യവിമാനം 12നെത്തും
കണ്ണൂര്: കൊറോണ വ്യാപനത്തിന്റെ പശ്ചാത്തലത്തില് വിദേശരാജ്യങ്ങളില് നിന്നും ഇതര സംസ്ഥാനങ്ങളില് നിന്നും ജില്ലയിലെത്തിയവരുടെ ക്വാറന്റൈന് നടപടികള് ഉറപ്പുവരുത്താന് ശക്തമായ നടപടികള് ആരംഭിച്ചു. ഇതുമായി ബന്ധപ്പെട്ട് ജില്ലയില് കൈക്കൊണ്ട ക്രമീകരണങ്ങള് ജില്ലാ കലക്ടര് ടി വി സുഭാഷിന്റെ അധ്യക്ഷതയില് ചേര്ന്ന അവലോകന യോഗം വിലയിരുത്തി. ആശുപത്രി, കൊറോണ കെയര് സെന്റര് നിരീക്ഷണത്തോടൊപ്പം ഹോം ക്വാറന്റൈന് ശക്തിപ്പെടുത്തുന്നതിലൂടെ മാത്രമേ കൊവിഡ് വ്യാപന സാധ്യത ഇല്ലാതാക്കാനാവൂ എന്ന് ജില്ലാ കലക്ടര് പറഞ്ഞു. ഇതിനു വാര്ഡ് തലത്തില് പോലിസ്, തദ്ദേശ സ്ഥാപന പ്രതിനിധി, ആരോഗ്യ വകുപ്പ് പ്രതിനിധി എന്നിവരുടെ നേതൃത്വത്തിലുള്ള സമിതികള് പ്രവര്ത്തനം ആരംഭിച്ചുകഴിഞ്ഞു. ഇതിനായി ജില്ലയില് ലോക്ക് ദി ഹോം എന്ന പേരില് പ്രത്യേക പദ്ധതി ആവിഷ്കരിച്ച് നടപ്പാക്കുന്നുണ്ട്.
നേരത്തേയുണ്ടായ അനുഭവങ്ങളില് നിന്ന് പാഠമുള്ക്കൊണ്ട്, സമ്പര്ക്കത്തിലൂടെ ഒരാള്ക്കു പോലും രോഗബാധ ഉണ്ടാവുന്നില്ലെന്ന് ഉറപ്പുവരുത്തുകയാണ് ഇതിലൂടെ ലക്ഷ്യമിടുന്നത്. ഹോം ക്വാറന്റൈന് നിയന്ത്രണങ്ങള് ലംഘിക്കുന്നവരെ കൊറോണ കെയര് സെന്ററിലേക്ക് മാറ്റുന്നതുള്പ്പെടെയുള്ള നടപടികള് കൈക്കൊള്ളുമെന്നും ജില്ലാ കലക്ടര് വ്യക്തമാക്കി. മൊബൈല് ആപ്പ് വഴിയുള്ള നിരീക്ഷണവും ശക്തമാക്കും. കാലിക്കടവ്, മാഹി, നെടുംപൊയില് എന്നിവിടങ്ങളില് സജ്ജീകരിച്ച ചെക്ക്പോയിന്റുകളിലൂടെ കര്ശന സ്ക്രീനിങിന് വിധേയമാക്കിയ ശേഷമാണ് ഇതര സംസ്ഥാനങ്ങളില് നിന്നുള്ളവരെ ജില്ലയിലേക്ക് കടത്തിവിടുന്നത്. മെയ് നാലുമുതല് മൂന്ന് അതിര്ത്തികളിലൂടെ 3500ലേറെ പേര് ജില്ലയിലെത്തി. ഇവരില് സ്ക്രീനിങില് രോഗലക്ഷണങ്ങള് കണ്ടെത്തിയ 10 പേരെ ആശുപത്രികളിലും റെഡ് ജില്ലകളില് നിന്നെത്തിയ 568 പേരെ വിവിധ കൊവിഡ് കെയര് സെന്ററുകളിലും 2945 പേരെ വീടുകളിലുമാണ് നിരീക്ഷണത്തിലാക്കിയിരിക്കുന്നത്. ഇതിനുപുറമെ കരിപ്പൂര്, നെടുമ്പാശ്ശേരി വിമാനത്താവളങ്ങള് വഴി 21 വിദേശമലയാളികളും ഇതിനകം ജില്ലയിലെത്തിയിട്ടുണ്ട്. ഇവരില് ഏഴ് ഗര്ഭിണികളും അവരുടെ കുട്ടികളും ഉള്പ്പെടെ 11 പേര് വീടുകളിലും 10 പേര് കൊറോണ കെയര് സെന്ററുകളിലുമാണുള്ളത്. യോഗത്തില് മന്ത്രി രാമചന്ദ്രന് കടന്നപ്പള്ളി, മേയര് സുമാ ബാലകൃഷ്ണന്, ജില്ലാ പഞ്ചായത്ത് പ്രസിഡന്റ് കെ വി സുമേഷ്, സബ് കലക്ടര്മാരായ ആസിഫ് കെ യൂസഫ്, എസ് ഇലാക്യ, അഡീഷനല് എസ്പി പ്രജീഷ് തോട്ടത്തില്, എഡിഎം ഇ പി മേഴ്സി സംബന്ധിച്ചു.
അതിനിടെ, വിദേശരാജ്യങ്ങളില്നിന്ന് മടങ്ങിവരുന്ന പ്രവാസികളെ സ്വീകരിക്കാന് കണ്ണൂര് അന്താരാഷ്ട്ര വിമാനത്താവളം പൂര്ണസജ്ജമായി. അവസാനഘട്ട ഒരുക്കങ്ങള് മന്ത്രി രാമചന്ദ്രന് കടന്നപ്പള്ളിയുടെ അധ്യക്ഷതയില് വിമാനത്താവളത്തില് ചേര്ന്ന യോഗം വിലയിരുത്തി. 12ന് രാത്രി 7.10ന് ദുബയില്നിന്നുള്ള ആദ്യവിമാനം കണ്ണൂരിലിറങ്ങും. എയര് ഇന്ത്യ എക്സ്പ്രസ് വിമാനത്തില് 170ലേറെ യാത്രക്കാരുണ്ടാവും. സാമൂഹിക അകലം പാലിച്ച് 20 പേരടങ്ങുന്ന സംഘങ്ങളായാണ് യാത്രക്കാരെ വിമാനത്തില്നിന്ന് പുറത്തിറക്കുക.
RELATED STORIES
ബ്ലാസ്റ്റേഴ്സില് ഇവാന് വുകോമനോവിച്ച് യുഗം അവസാനിച്ചു
26 April 2024 2:53 PM GMTപലയിടത്തും രാത്രിയിലും നീണ്ടനിര; പോളിങ് ശതമാനം 70.03 പിന്നിട്ടു
26 April 2024 2:48 PM GMTകല്പറ്റയില് പിക്കപ്പിലേക്ക് ലോറി ഇടിച്ചുകയറി യുവാവ് മരിച്ചു
26 April 2024 2:25 PM GMTനീറ്റ് പരീക്ഷ മാര്ഗ നിര്ദേശക ക്ലാസ് 29ന്
26 April 2024 12:45 PM GMTസംസ്ഥാനത്ത് പലയിടത്തും വോട്ടിങ് മന്ദഗതിയിലെന്ന് ആക്ഷേപം; പോളിങ്...
26 April 2024 12:36 PM GMTവോട്ട് ചെയ്യുക എന്നത് ഓരോ പൗരന്റെയും അവകാശവും കടമയുമാണെന്ന് നടന്...
26 April 2024 11:33 AM GMT