ചികില്‍സാപിഴവിനെ തുടര്‍ന്ന് ഒന്നരവയസ്സുകാരിയുടെ മരണം: മോഹനന്‍ വൈദ്യര്‍ അറസ്റ്റില്‍

ആലപ്പുഴ: ചികില്‍സാ പിഴവിനെതുടര്‍ന്ന് ഒന്നരവയസുകാരി മരിച്ച സംഭവത്തില്‍ മോഹനന്‍ വൈദ്യര്‍ അറസ്റ്റില്‍. ഹൈക്കോടതി നിര്‍ദ്ദേശത്തെ തുടര്‍ന്ന് മോഹനന്‍ വൈദ്യര്‍ അന്വേഷണ ഉദ്യോഗസ്ഥന് മുന്നില്‍ ഹാജരാവുകയായിരുന്നു.

കുട്ടി മരിച്ച സംഭവത്തില്‍ മോഹനന്‍ വൈദ്യര്‍ മുന്‍കൂര്‍ ജാമ്യാപേക്ഷ സമര്‍പ്പിച്ചിരുന്നു. തുടര്‍ന്ന് കോടതി നിര്‍ദേശ പ്രകാരം അന്വേഷണ ഉദ്യോഗസ്ഥനു മുമ്പില്‍ കീഴടങ്ങിയ മോഹനന്റെ അറസ്റ്റ് രേഖപ്പെടുത്തിയത്. ഇന്ന് ഉച്ചയോടെയാണ് അറസ്റ്റ് ചെയ്തതെന്നാണ് വിവരം.

നേരത്തെ കുടുബത്തിന്റെ പരാതിയെ തുടര്‍ന്ന് മോഹനന്‍ വൈദ്യര്‍ക്ക് എതിരേ നരഹത്യക്ക് കേസെടുത്തിരുന്നു. മാരാരിക്കുളം പോലിസാണ് മനപ്പൂര്‍വമല്ലാത്ത നരഹത്യക്ക് കേസെടുത്തത്.

പ്രൊപ്പിയോണിക് അസീഡിമിയ എന്ന ജനിതക രോഗത്തിന് ചികില്‍സയിലായിരുന്ന കുഞ്ഞ് മോഹനന്റെ അശാസ്ത്രീയ ചികിത്സ കൊണ്ട് മരിച്ചു എന്ന് പരാതി ഉയര്‍ന്നിരുന്നു. ഇതേത്തുടര്‍ന്ന് കഴിഞ്ഞ ദിവസം അന്വേഷണം ആവശ്യപ്പെട്ട് ആരോഗ്യമന്ത്രി കെ കെ ശൈലജ മുഖ്യമന്ത്രിക്ക് കത്ത് നല്‍കുകയും ചെയ്തിരുന്നു. ഇതിന് പിന്നാലെയാണ് പോലിസ് നരഹത്യക്ക് കേസെടുത്തത്.