അനുരാഗ് താക്കൂറുമായുള്ള സൗഹൃദം; വിമര്‍ശനം ഉള്‍കൊള്ളുന്നു: എം ബി രാജേഷ്

തിരുവനന്തപുരം: ബിജെപി നേതാവും കേന്ദ്ര മന്ത്രിയുമായ അനുരാഗ് താക്കൂറുമായുള്ള സൗഹൃദത്തെ കുറിച്ചുള്ള ഫേസ്ബുക്ക് പോസ്റ്റ് വിവാദത്തിലായ സാഹചര്യത്തില്‍ വിശദീകരണവുമായി സ്പീക്കര്‍ എം ബി രാജേഷ്. ഒരു വിഭാഗം നടത്തുന്ന വിമര്‍ശനം ന്യായവും പ്രസക്തവുമാണെന്നും അത് ഉള്‍കൊള്ളുകയും മാനിക്കുകയും ചെയ്യുന്നെന്നും രാജേഷ് ഫേസ്ബുക്ക് പോസ്റ്റില്‍ വ്യക്തമാക്കി.

ഇച്ഛാഭംഗത്തിന്റെ മുറിവ് കാലത്തിനും ഉണക്കാന്‍ കഴിയാതെ പോയാല്‍, ചില മനുഷ്യര്‍ പഴയതു മറന്ന് പരസ്പര വിരുദ്ധമായി സംസാരിക്കും. അതിനെ ആ നിലയിലേ എടുക്കുന്നുള്ളുവെന്ന് വി ടി ബല്‍റാം ഉള്‍പ്പടെയുള്ളവരുടെ വിമര്‍ശനത്തെ ലക്ഷ്യംവെച്ച് രാജേഷ് പറഞ്ഞു. എന്നാല്‍ മറ്റു ചിലര്‍ ഉയര്‍ത്തിയ വിമര്‍ശനം അങ്ങനെയല്ല. ഡല്‍ഹി വംശഹത്യക്ക് നിദാനമായ വിദ്വേഷ പ്രസംഗം നടത്തിയ അനുരാഗ് താക്കൂറിന്റെ തീവ്ര നിലപാടുകളെ ചൂണ്ടിക്കാണിച്ച് അവര്‍ ഉയര്‍ത്തിയ വിമര്‍ശനം ന്യായവും പ്രസക്തവുമാണ്. അതിനെ പൂര്‍ണ്ണമായും മാനിക്കുകയും ഉള്‍ക്കൊള്ളുകയും ചെയ്യുന്നുവെന്നും രാജേഷ് വ്യക്തമാക്കി.

ഷിംലയില്‍ ഔദ്യോഗിക യോഗത്തില്‍ പങ്കെടുക്കുന്നതിനിടെ അനുരാഗ് താക്കൂറിനൊപ്പം നില്‍ക്കുന്ന ഫോട്ടോ പോസ്റ്റ് ചെയ്താണ് രാജേഷ് തങ്ങളുടെ സൗഹൃദത്തേക്കുറിച്ച് വാചാലനായത്. ഇത് ഫേസ്ബുക്കില്‍ വലിയ വിമര്‍ശനത്തിന് കാരണമായി. രാഷ്ട്രീയ എതിരാളികള്‍ക്കൊപ്പം ഒരുവിഭാഗം സിപിഎം അനുയായികളും രാജേഷിനെതിരെ വിമര്‍ശനവുമായി രംഗത്തെത്തിയിരുന്നു.