മലപ്പുറം സ്വദേശിക്ക് 'യുപി പോലിസ്' ഭീഷണി; ജില്ലാ പോലിസ് മേധാവിക്ക് പരാതി നല്‍കി വിദ്യാര്‍ഥി

മലപ്പുറം: ഉത്തര്‍പ്രദേശ് പോലിസ് എന്ന പേരില്‍ മലപ്പുറം സ്വദേശിയായ വിദ്യാര്‍ഥിയെ നിരന്തരം ഫോണില്‍ വിളിച്ച് ഭീഷണിപ്പെടുത്തുന്നതായി പരാതി. മലപ്പുറം കോഡൂര്‍ സ്വദേശി മുരിങ്ങാത്തോടന്‍ മുഹമ്മദ് മുര്‍ഷിദിന് നേരയാണ് ഭീഷണി.

സംഭവത്തില്‍ മുര്‍ഷിദ് പറയുന്നതിങ്ങനെ. തന്റെ ഒരു ബന്ധുവിനെ കാണാതായിരുന്നു. അവരുടെ വീട്ടുകാര്‍ ആവശ്യപെട്ടതു പ്രകാരം അയാളുടെ ഫോണിലേക്ക് വിളിച്ചിരുന്നു. എന്നാല്‍ ഫോണ്‍ എടുത്തയാള്‍ ഒന്നും പറയാതെ ഫോണ്‍ കട്ട് ചെയ്തു.

പിന്നീടാണ് ഉത്തര്‍പ്രദേശ് പോലിസിന്റെ പിടിയിലാണ് ബന്ധു എന്ന് അറിഞ്ഞത്. പിന്നാലെ ഹിന്ദിയിലും ഇംഗ്ലീഷിലുമായി ഭീഷണി വന്നു തുടങ്ങി. യുപി പോലിസാണെന്നും നിങ്ങളെ കേസില്‍ കുടുക്കുമെന്നും പറഞ്ഞാണ് ഭീഷണി കോള്‍ വന്നത്.

മുഹമ്മദ് മുര്‍ഷിദ് ജില്ലാ പോലിസ് മേധാവിക്ക് പരാതി നല്‍കി. ഭീഷണി കോള്‍ വന്ന നമ്പറും കോള്‍ റിക്കാര്‍ഡുകളും മുഹമ്മദ് മുര്‍ഷിദ് പോലിസിന് കൈമാറിയിട്ടുണ്ട്.