പെണ്‍കുട്ടികള്‍ക്ക് കുടുംബാംഗങ്ങളുടെ ക്രൂരമര്‍ദ്ദനം; ഞെട്ടിക്കുന്ന വീഡിയോ പുറത്ത്

ഭോപ്പാല്‍: മധ്യപ്രദേശില്‍ ഗോത്ര വിഭാഗക്കാരായ രണ്ട് പെണ്‍കുട്ടികളെ കുടുംബാഗങ്ങള്‍ ക്രൂരമായി മര്‍ദ്ദിക്കുന്ന വീഡിയോ പുറത്ത്. രണ്ട് പെണ്‍കുട്ടികളെ വടിയും മറ്റും കൊണ്ട് അടിക്കുകയും മുടിയില്‍ പിടിച്ച് വലിച്ചിഴക്കുകയും ചെയ്യുന്നതാണ് ദൃശ്യങ്ങളിലുള്ളത്. മാതൃസഹോദരന്മാരുമായി സംസാരിക്കുന്നുവെന്നു പറഞ്ഞാണ് പെണ്‍കുട്ടികളെ മാതാവിന്റെ സഹോദരങ്ങള്‍ പെണ്‍കുട്ടികളെ ആളുകള്‍ നോക്കിനില്‍ക്കേ മര്‍ദ്ദിച്ചത്.

നിരവധി പേര്‍ കുറ്റകൃത്യം കാഴ്ചക്കാരായി കാണുകയും വീഡിയോ പകര്‍ത്തുകയും ചെയ്യുന്നുണ്ടെങ്കിലും ആരും രക്ഷിക്കാന്‍ മുതിരുന്നില്ല. ഇക്കഴിഞ്ഞ ജൂണ്‍ 22 ന് നടന്ന സംഭവം ദിവസങ്ങള്‍ക്ക് ശേഷമാണ് സാമൂഹിക മാധ്യമങ്ങളില്‍ വ്യാപകമായി പ്രചരിച്ചത്. തുടര്‍ന്ന് പോലിസ് ഇടപെടുകയും യുവതികളെ വൈദ്യപരിശോധനയ്ക്ക് അയക്കുകയും ചെയ്തു. ഒരു പെണ്‍കുട്ടിയുടെ മാതാവും സഹോദരനും ഉള്‍പ്പെടെ ഏഴു പേരെ അറസ്റ്റ് ചെയ്തതായും പോലിസ് പറഞ്ഞു.

മധ്യപ്രദേശിലെ ധാര്‍ ജില്ലയിലെ പിപാല്‍വ ഗ്രാമത്തിലാണ് ക്രൂരമായ കുറ്റകൃത്യം നടന്നത്. പുഴയോരത്തു നില്‍ക്കുന്ന പെണ്‍കുട്ടികളെ അവരുടെ കസിന്‍മാര്‍ ക്രൂരമായി മര്‍ദ്ദിക്കുകയായിരുന്നു. മര്‍ദ്ദനത്തില്‍ നിന്ന് രക്ഷപ്പെടാന്‍ ശ്രമിക്കുന്നതിനിടെ ഒരു പെണ്‍കുട്ടിയുടെ തലമുടിയില്‍ ചവിട്ടുകയും വലിച്ചിഴയ്ക്കുകയും ചെയ്യുന്നുണ്ട്. പെണ്‍കുട്ടി വേദന കൊണ്ട് അലറി വിളിക്കുന്നതും വീഡിയോയില്‍ കാണുന്നുണ്ട്. ഒരു പ്രതി വടി പൊട്ടുന്നതുവരെ അവളെ അടിക്കുന്നുണ്ട്. മറ്റൊരു വീഡിയോയില്‍, പെണ്‍കുട്ടിയുടെ മാതാവും ക്രൂരമായ മര്‍ദ്ദനത്തില്‍ പങ്കുചേരുന്നുണ്ട്. അടിക്കുകയും തലമുടി വലിക്കുകയും ചെയ്യുന്നത് കാണുന്നുണ്ട്.

മധ്യപ്രദേശില്‍ നിന്നു തന്നെ സമാനമായ ക്രൂരത ദിവസങ്ങള്‍ക്കു മുമ്പ് പുറത്തുവന്നിരുന്നു. അലിരാജ്പൂരിലെ 19 വയസുള്ള യുവതിയെ മരത്തില്‍ കെട്ടിയിട്ട് പിതാവും മാതൃസഹോദരങ്ങളും ചേര്‍ന്ന് വടികൊണ്ട് അടിക്കുന്നതാണ് ദൃശ്യങ്ങളിലുണ്ടായിരുന്നത്. മൂന്നുമാസം മുമ്പ് വിവാഹിതയായ യുവതി ഭര്‍തൃവീട്ടില്‍ നിന്ന് സ്വന്തം വീട്ടിലെത്തിയതിനെ ചൊല്ലിയാണ് കുടുംബാംഗങ്ങള്‍ കെട്ടിയിട്ട് തല്ലിച്ചതച്ചത്.

Madhya Pradesh Shocker On Camera: Women Beaten With Sticks By Family