പൗരത്വ ബില്ലിനെതിരേ കോലം വരച്ച് പ്രതിഷേധം: പാക് ബന്ധം ആരോപിച്ച പോലിസ് കമ്മീഷണര്‍ക്കെതിരേ നിയമ നടപടി സ്വീകരിക്കുമെന്ന് ഗായത്രി

ചെന്നൈ: പൗരത്വ ബില്ലിനെതിരേ കോലം വരച്ച് പ്രതിഷേധിച്ചവര്‍ക്ക് പാകിസ്താന്‍ ബന്ധമുണ്ടെന്ന് ആരോപിച്ച ചെന്നൈ പോലിസ് കമ്മീഷണര്‍ എ കെ വിശ്വനാഥനെതിരേ നിയമ നടപടി സ്വീകരിക്കുമെന്ന് മനുഷ്യാവകാശ പ്രവര്‍ത്തക ഗായത്രി പറഞ്ഞു. ഒന്‍പത് രാജ്യങ്ങളിലെ മനുഷ്യാവകാശ സംഘടനകളില്‍ താന്‍ അംഗമാണെന്നും കമ്മീഷണര്‍ തെറ്റായ വിവരങ്ങളാണ് പ്രചരിപ്പിയ്ക്കുന്നതെന്നും ഗായത്രി പറഞ്ഞു.

കഴിഞ്ഞ ദിവസം ബസന്ത് നഗറില്‍ കോലമെഴുതി പ്രതിഷേധിച്ചതിന് ഗായത്രി ഉള്‍പ്പെടെ ഏഴു പേരെ അറസ്റ്റു ചെയ്തിരുന്നു. ഇതിന് പിന്നാലെയാണ് കമ്മീഷണര്‍ പാകിസ്താന്‍ ബന്ധം ആരോപിച്ചത്.

ഗായത്രി കന്താദായ് പാകിസ്താനിലെ 'ബൈറ്റ്‌സ് ഫോര്‍ ഓള്‍' സ്ഥാപനത്തിലെ ഗവേഷകയാണെന്ന് അവരുടെ ഫേസ്ബുക്ക് പ്രൊഫൈലില്‍ ഉണ്ടെന്നായിരുന്നു പോലിസ് കമ്മീഷണര്‍ പറഞ്ഞത്. കൂടുതല്‍ അന്വേഷണം നടന്നുവരികയാണെന്നും പോലിസ് അറിയിച്ചു. ഗായത്രിയുടെ ഫേസ്ബുക്കും മറ്റ് സോഷ്യല്‍ മീഡിയ ഇടപെടലുകളും പോലിസ് പരിശോധിച്ച് വരികയാണെന്നും കമ്മീഷണര്‍ പറഞ്ഞു.

കോലം വരച്ച് പ്രതിഷേധിച്ചവരെ പോലിസ് അറസ്റ്റ് ചെയ്ത നടപടി വ്യാപക പ്രതിഷേധത്തിന് ഇടയാക്കിയിരുന്നു. പ്രതിഷേധക്കാരെ പിന്തുണച്ച ഡിഎംകെ നേതാവ് എംകെ സ്റ്റാലിനും കനിമൊഴിയും തങ്ങളുടെ വസതിക്ക് മുന്നില്‍ സിഎഎ വിരുദ്ധ മുദ്രാവാക്യങ്ങളുമായി കോലം വരച്ചു.