സന്തോഷ് ട്രോഫി നേടിയാല്‍ കേരള ടീമിന് ഒരു കോടി രൂപ; പ്രഖ്യാപനവുമായി ഡോ. ഷംഷീര്‍ വയലില്‍

മലപ്പുറം: സന്തോഷ് ട്രോഫി ഫൈനലില്‍ ജയിച്ചാല്‍ കേരള ടീമിന് ഒരുകോടി രൂപ പാരിതോഷികം നല്‍കുമെന്ന പ്രഖ്യാപനവുമായി പ്രവാസി സംരംഭകന്‍ ഡോ. ഷംഷീര്‍ വയലില്‍. ഏഴാം സന്തോഷ് ട്രോഫി കിരീടം സ്വപ്നം കാണുന്ന കേരളാടീമിന് പ്രോത്സാഹനമായാണ് പാരിതോഷികം പ്രഖ്യാപിച്ചത്.

കേരളവും ബംഗാളും തമ്മിലുള്ള ഫൈനല്‍ മത്സരം ഇന്ന് വൈകിട്ട് നടക്കാനിരിക്കെ ട്വിറ്ററിലൂടെയായിരുന്നു അദ്ദേഹത്തിന്റെ പ്രഖ്യാപനം. പ്രമുഖ പ്രവാസി സംരംഭകനായ ഡോ. ഷംഷീര്‍ വയലില്‍ വിപിഎസ് ഹെല്‍ത്ത് കെയര്‍ ഗ്രൂപ്പിന്റെ ചെയര്‍മാനും മാനേജിങ് ഡയറക്ടറുമാണ്.

രാത്രി എട്ടുമണിക്ക് മഞ്ചേരി പയ്യനാട് സ്‌റ്റേഡിയത്തില്‍ ആണ് മത്സരം. സ്വന്തം മണ്ണില്‍ ഏഴാം കിരീടം കൊതിക്കുന്ന കേരളവും മുപ്പത്തി മൂന്നാം തവണയും കിരീടത്തില്‍ മുത്തമിടാന്‍ തയ്യാറെടുക്കുന്ന ബംഗാളുമാണ് മുഖാമുഖം. കര്‍ണാടകയെ തകര്‍ത്താണ് കേരളം ഫൈനലില്‍ എത്തിയത്. മണിപ്പൂരിനെ പരാജയപ്പെടുത്തിയാണ് ബംഗാളിന്റെ വരവ്.