വൈഷ്ണയ്ക്ക് മല്‍സരിക്കാനാകുമോ? തീരുമാനം ഇന്നറിയാം

തിരുവനന്തപുരം: കോര്‍പറേഷനിലെ മുട്ടട വാര്‍ഡിലെ കോണ്‍ഗ്രസ് സ്ഥാനാര്‍ഥി വൈഷ്ണ സുരേഷിനെ വോട്ടര്‍ പട്ടികയില്‍ നിന്ന് ഒഴിവാക്കിയ സംഭവത്തില്‍ തിരഞ്ഞെടുപ്പ് കമ്മിഷന്‍ തെളിവെടുപ്പ് നടത്തി. വൈഷ്ണയുടെയും വോട്ടര്‍ പട്ടികയില്‍ നിന്ന് ഒഴിവാക്കാന്‍ പരാതി നല്‍കിയ സിപിഎം ബ്രാഞ്ച് അംഗം ധനേഷ് കുമാറിന്റെയും വാദം കേട്ട കമ്മിഷന്‍, തീരുമാനം ഇന്ന് ഉച്ചയ്ക്കു മുന്‍പ് പ്രഖ്യാപിക്കുമെന്ന് ഇരു ഭാഗത്തെയും അറിയിച്ചു. വൈഷ്ണ ഹൈക്കോടതിയില്‍ നല്‍കിയ ഹരജിയിലെ നിര്‍ദേശ പ്രകാരമാണ് തിരഞ്ഞെടുപ്പ് കമ്മീഷന്റെ നടപടി.

സംസ്ഥാന തിരഞ്ഞെടുപ്പ് കമ്മിഷണര്‍ എ ഷാജഹാന്റെ ഓഫിസില്‍ ഹിയറിങ് രണ്ടര മണിക്കൂറോളം നീണ്ടു. വോട്ടര്‍ പട്ടികയില്‍ നിന്നു പേരു നീക്കം ചെയ്യുന്നതിനുള്ള നടപടിക്രമങ്ങളൊന്നും പാലിക്കാതെയാണ് ഇലക്ടറല്‍ റജിസ്‌ട്രേഷന്‍ ഓഫിസറും മറ്റ് അധികൃതരും പ്രവര്‍ത്തിച്ചതെന്ന് വൈഷ്ണയ്ക്കു വേണ്ടി ഹാജരായ അഡ്വ.മൃദുല്‍ ജോണ്‍ മാത്യു കമ്മിഷനെ അറിയിച്ചു. പരാതി നല്‍കിയ ധനേഷിന്റെ വീട്ടു നമ്പറില്‍ 28 വോട്ടര്‍മാരുടെ പേരുണ്ടെന്നും അഭിഭാഷകന്‍ അറിയിച്ചെങ്കിലും അതിന് ഈ കേസുമായി നേരിട്ടു ബന്ധമില്ലാത്തതിനാല്‍ പരിഗണിക്കുന്നില്ലെന്നു കമ്മിഷന്‍ പറഞ്ഞു.