ബം​ഗാളിലും പൗരത്വ പ്രക്ഷോഭം പുനരാരംഭിക്കുന്നു; പൗരത്വ നിയമത്തിന്റെ ഒന്നാം വാർഷികത്തിൽ പ്രതിഷേധം

കൊൽക്കത്ത: ബം​ഗാളിലും പൗരത്വ പ്രക്ഷോഭം പുനരാരംഭിക്കുന്നു. ഇതിന് മുന്നോടിയായി പൗരത്വ നിയമത്തിന്റെ ഒന്നാം വാർഷികത്തിൽ പ്രതിഷേധം സംഘടിപ്പിച്ചു. പൗരത്വ നിയമം തള്ളിക്കളയുക എന്ന മുദ്രാവാക്യവുമായാണ് ശനിയാഴ്ച കൊൽക്കത്തയിലെ രാജബസാറിൽ 200 ഓളം പ്രക്ഷോഭകർ ഒത്തുകൂടിയത്.

ബംഗാളിലെ സി‌എ‌എ വിരുദ്ധ, എൻ‌ആർ‌സി വിരുദ്ധ പ്രസ്ഥാനങ്ങളുമായി ബന്ധപ്പെട്ട പൊതുവേദിയായ എൻ‌ആർ‌സിക്കെതിരായ ജോയിന്റ് ഫോറമാണ് പ്രതിഷേധം സംഘടിപ്പിച്ചത്. ബിജെപിയുടെ നേതൃത്വത്തിലുള്ള കേന്ദ്രം നിയമം നടപ്പാക്കാൻ തുടങ്ങുന്ന നിമിഷം മുതൽ പൗരത്വ പ്രക്ഷോഭം ആരംഭിക്കുമെന്ന് ഫോറം അറിയിച്ചു.

കൃത്യം ഒരു വർഷം മുമ്പാണ് ഈ നിയമം നിലവിൽ വന്നത്, ഇത് രാജ്യവ്യാപകമായി പ്രതിഷേധത്തിനിടയാക്കി. നിയമം നടപ്പാക്കുന്നതിന് നരേന്ദ്ര മോദി സർക്കാർ ഗസറ്റ് വിജ്ഞാപനം പുറപ്പെടുവിക്കുകയാണെങ്കിൽ, അത് നടപ്പാക്കുന്നത് തടയാൻ ഞങ്ങൾ വീണ്ടും തെരുവിലിറങ്ങുമെന്ന് ഫോറം കൺവീനർ പ്രസൻജിത് ബോസ് പറഞ്ഞു.