അഴിയൂരില്‍ കരുവയലില്‍ ആര്‍എസ്എസ് കേന്ദ്രത്തില്‍നിന്ന് വന്‍ ബോംബ് ശേഖരം പിടികൂടി; നാട്ടുകാര്‍ ഭീതിയില്‍

കോഴിക്കോട്: അഴിയൂരില്‍ കരുവയലില്‍ ആര്‍എസ്എസ് കേന്ദ്രത്തില്‍നിന്ന് വന്‍ ബോംബ് ശേഖരം പിടികൂടി. അഴിയൂര്‍ കരുവയലില്‍ പുളിയേരി നട ഭാഗം ഒതയോത്ത് പരവന്റവിട ഒഴിഞ്ഞ പറമ്പില്‍ നിന്നാണ് ഉഗ്രശേഷിയുള്ള ബോംബുകള്‍ കണ്ടെത്തിയത്. സംഭവം പ്രദേശത്തുകാരെ ഭീതിയിലാഴ്ത്തിയിരിക്കുകയാണ്.

സമീപവാസിയായ സ്ത്രീ പറമ്പിലെ നാഗത്തറയില്‍ വിളക്ക് കത്തിക്കാന്‍ വന്നപ്പോഴാണ് ബോംബുകള്‍ ശ്രദ്ധയില്‍ പെട്ടത്. ഉഗ്ര സ്‌ഫോടന ശേഷിയുള്ള സ്റ്റീല്‍ ബോംബുകളും നാടന്‍ ബോംബുകളും ചോമ്പാല്‍ പോലിസും ബോംബ് സ്‌ക്വാഡും ചേര്‍ന്ന് നിര്‍വ്വീരമാക്കി. ആളൊഴിഞ്ഞ പ്രദേശമായ ഇവിടങ്ങളില്‍ രാത്രി കാലങ്ങളില്‍ അപരിചതായ ആളുകള്‍ എത്താറുണ്ടെന്ന് പരിസരവാസികള്‍ അറിയിച്ചു. അന്യജില്ലകളിലുള്ള കൊലക്കേസ് പ്രതികളടക്കം കുറച്ചുപേര്‍ ദിവസങ്ങളായി ഈ പ്രദേശത്ത് ക്യാംപ് ചെയ്യുന്നതായും അറിയുന്നു.

നിയമസഭ ഇലക്ഷന്‍ അടുത്ത സമയത്ത് മനപ്പൂര്‍വ്വം അഴിയൂര്‍ പ്രദേശത്ത് സഘര്‍ഷം സൃഷ്ടിക്കാനുള്ള തയ്യാറെടുപ്പിലാണ് ആര്‍എസ്എസ് ക്രിമിനല്‍ സംഘം ഇവിടെ ക്യാംപ് ചെയ്യുന്നതെന്ന് പ്രദേശവാസികള്‍ ആരോപിക്കുന്നു. ഇവിടങ്ങളില്‍ രാത്രി കാലങ്ങളില്‍ സാമൂഹ്യ വിരുദ്ധര്‍ താവളമാക്കിയിട്ട് കുറച്ച് കാലമായി എന്നും ഈ പ്രദേശത്ത് പോലിസിന്റെ ശ്രദ്ധ കൂടുതല്‍ ചെലുത്തണമെന്നും സമീപവാസികള്‍ ആവശ്യപ്പെട്ടു.