യുഎസില്‍ അനധികൃതമായി കുടിയേറിയ 112 ഇന്ത്യക്കാര്‍ കൂടി തിരിച്ചെത്തി

അമൃത്‌സര്‍: അനധികൃതമായി കുടിയേറിയ 112 ഇന്ത്യക്കാരെ കൂടി യുഎസ് തിരിച്ചയച്ചു. ഇവരെ കയറ്റി വന്ന യുഎസ് സൈനികവിമാനം ഞായറാഴ്ച രാത്രി 10 മണിയോടെ അമൃത്‌സര്‍ വിമാനത്താവളത്തില്‍ ഇറങ്ങി. ഇതില്‍ 44 പേര്‍ ഹരിയാണ സ്വദേശികളും 33 പേര്‍ ഗുജറാത്ത് സ്വദേശികളും 31 പേര്‍ പഞ്ചാബ് സ്വദേശികളും രണ്ടുപേര്‍ ഉത്തര്‍പ്രദേശ് സ്വദേശികളുമാണ്. ഹിമാചല്‍ പ്രദേശില്‍നിന്നും ഉത്തരാഖണ്ഡില്‍നിന്നുമുള്ള ഓരോരുത്തരും തിരിച്ചയക്കപ്പെട്ടവരുടെ കൂട്ടത്തിലുണ്ട്.

ഫെബ്രുവരി അഞ്ചിനാണ് നാടുകടത്തപ്പെട്ടവരെയും വഹിച്ചുകൊണ്ടുള്ള ആദ്യത്തെ വിമാനം ഇന്ത്യയിലെത്തിയത്. അമൃത്‌സര്‍ വിമാനത്താവളത്തില്‍ ഇറങ്ങിയ വിമാനത്തില്‍ 104 പേരാണ് ഉണ്ടായിരുന്നത്. ശനിയാഴ്ച എത്തിയ രണ്ടാമത്തെ വിമാനത്തില്‍ 116 പേരും ഉണ്ടായിരുന്നു.