ലോക ഗുസ്തി ചാംപ്യന്‍ഷിപ്പ്; അന്‍ഷു മാലിക്കിന് വെള്ളി

ഓസ്ലോ: ലോക ഗുസ്തി ചാംപ്യന്‍ഷിപ്പില്‍ വെള്ളി മെഡല്‍ നേടുന്ന ആദ്യ ഇന്ത്യന്‍ വനിതാ താരമായി അന്‍ഷു മാലിക്ക്. ഓസ്ലോയില്‍ നടന്ന മല്‍സരത്തില്‍ അമേരിക്കയുടെ ഹെലന്‍ മറൗലിസ് അന്‍ഷുവിനെ പരാജയപ്പെടുത്തിയതോടെ താരത്തിന് സ്വര്‍ണ്ണം നഷ്ടമാവുകയായിരുന്നു. രണ്ടാം സ്ഥാനത്തോടെ അന്‍ഷു വെള്ളി കരസ്ഥമാക്കി. 4-1നാണ് അമേരിക്കന്‍ താരത്തിന്റെ ജയം. മല്‍സരത്തിനിടെ അന്‍ഷുവിന് കൈക്ക് പരിക്കേറ്റിരുന്നു. നിരവധി തവണ താരം വൈദ്യ സഹായം തേടിയിരുന്നു. മികച്ച ഫോമിലുള്ള അന്‍ഷു സ്വര്‍ണ്ണം പ്രതീക്ഷിച്ചിരുന്നു. എന്നാല്‍ പരിക്ക് വില്ലനാവുകയായിരുന്നു. ഗീതാ ഫൊഗാട്ട്, ബബിത ഫൊഗാട്ട്, വിനേഷ് ഫൊഗാട്ട്, പൂജ ഡണ്ട എന്നിവര്‍ മുന്‍ വര്‍ഷങ്ങളില്‍ നടന്ന ചാംപ്യന്‍ഷിപ്പുകളില്‍ ഇന്ത്യയ്ക്കായി വെങ്കല മെഡല്‍ കരസ്ഥമാക്കിയിരുന്നു.