നാണക്കേട് ഒഴിയാതെ യുനൈറ്റഡ്; പ്രീമിയര്‍ ലീഗില്‍ വാറ്റ്‌ഫോഡിനോടും തോല്‍വി

മാഞ്ചസ്റ്റര്‍: ഇംഗ്ലിഷ് പ്രീമിയര്‍ ലീഗില്‍ മാഞ്ചസ്റ്റര്‍ യുനൈറ്റഡിന്റെ ദുരന്തം തുടരുന്നു. ഇന്ന് 16ാം സ്ഥാനത്തുള്ള വാറ്റ്‌ഫോഡിനോടും യുനൈറ്റഡ് തോല്‍വി വഴങ്ങി. ലീഗില്‍ ഏഴാം സ്ഥാനത്തുള്ള ഒലെയുടെ ചെകുത്താന്‍മാര്‍ 4-1നാണ് പരാജയം രുചിച്ചത്.ക്രിസ്റ്റ്യാനൊ റൊണാള്‍ഡോയടങ്ങുന്ന വന്‍ താരനിരയുണ്ടായിട്ടും പതിവ് പോലെ അവര്‍ തോല്‍വി നേരിട്ടു. അന്താരാഷ്ട്ര മല്‍സരങ്ങളുടെ ഇടവേളയ്ക്ക് ശേഷമെത്തിയ താരങ്ങളില്‍ നിന്ന് ആരാധകര്‍ മാറ്റം പ്രതീക്ഷിച്ചിരുന്നെങ്കിലും അത് നടന്നില്ല. തുടക്കം മുതലെ യുനൈറ്റഡ് വന്‍ പരാജയമായിരുന്നു. രണ്ടാം പകുതിയില്‍ പകരക്കാരനായെത്തിയ വാന്‍ ഡീ ബീക്കായിരുന്നു യുനൈറ്റഡിന്റെ ആശ്വാസ ഗോള്‍ നേടിയത്. റൊണാള്‍ഡോയുടെ അസിസ്റ്റില്‍ നിന്നായിരുന്നു ഗോള്‍. 69ാം മിനിറ്റില്‍ ഹാരി മാഗ്വെയര്‍ ചുവപ്പ് കാര്‍ഡ് കണ്ട് പുറത്തായതും അവര്‍ക്ക് തിരിച്ചടിയായി.