അല്‍ നസ്‌റിനായി റൊണാള്‍ഡോയുടെ ആദ്യ ഗോള്‍; അല്‍ ഫത്തെഹിനോട് സമനില

റിയാദ്: സൗദി പ്രോ ലീഗില്‍ അല്‍ നസ്‌റിനായി ക്രിസ്റ്റിയാനോ റൊണാള്‍ഡോ ആദ്യ ഗോള്‍ സ്‌കോര്‍ ചെയ്തു. അല്‍ ഫത്തെഹിനെതിരായ മല്‍സരത്തില്‍ ഇഞ്ചുറി ടൈമില്‍ പെനാല്‍റ്റിയിലൂടെയാണ് താരം ഗോള്‍ നേടിയത്. റൊണാള്‍ഡോയുടെ ഗോളിലൂടെയാണ് ടീം ആശ്വാസ സമനില നേടിയത്. മല്‍സരം 2-2 സമനിലയിലാണ് അവസാനിച്ചത്. 12ാം മിനിറ്റില്‍ ക്രിസ്റ്റിയാന്‍ ടെല്ലോയിലൂടെ അല്‍ ഫത്തെഹാണ് ലീഡെടുത്തത്. 42ാം മിനിറ്റില്‍ അല്‍ നസ്‌റിന്റെ ഒന്നാം നമ്പര്‍ താരം ആന്‍ഡേഴ്‌സണ്‍ ടലിസ്‌കയിലൂടെ ടീം സമനില പിടിച്ചു. 58ാം മിനിറ്റില്‍ അള്‍ജീരിയന്‍ താരം സോഫിയാനെ ബെന്‍ഡെബ്കയിലൂടെ അല്‍ ഫത്തെഹ് വീണ്ടും ലീഡെടുത്തു. തുടര്‍ന്ന് ഇഞ്ചുറി ടൈമിലെ റൊണാള്‍ഡോയുടെ ഗോള്‍ അല്‍ നസര്‍ ടീമിന് ആശ്വാസമാവുകയായിരുന്നു. ലീഗില്‍ അല്‍ നസര്‍ ഒന്നാം സ്ഥാനത്തും അല്‍ ഫത്തെഹ് ആറാം സ്ഥാനത്തുമാണ്.