ഫ്രീ ട്രാന്‍സ്ഫര്‍ പരിധി കഴിഞ്ഞു; മെസ്സി ബാഴ്സയില്‍ തുടരും

ക്യാംപ് നൗ: സൂപ്പര്‍താരം ലയണല്‍ മെസ്സി അടുത്ത സീസണിലും ബാഴ്സയില്‍ തുടരും. കരാര്‍ കാലാവധി അവസാനിക്കാന്‍ ഒരുവര്‍ഷം കൂടിയുള്ള മെസ്സിക്ക് ഈ സീസണില്‍ ഫ്രീ ട്രാന്‍സ്ഫറില്‍ ക്ലബ്ബ് മാറാനുള്ള അവസരമിണ്ടായിരുന്നു. എന്നാല്‍, താരം ഇത് നിരാകരിക്കുകയായിരുന്നു. ഫ്രീ ട്രാന്‍സ്ഫറില്‍ ക്ലബ്ബ് മാറാനുള്ള അവസാന തിയ്യതി കഴിഞ്ഞ ദിവസമായിരുന്നു. ഇത് അവസാനിച്ചതോടെയാണ് താരം ബാഴ്സയില്‍ തുടരുമെന്ന് വ്യക്തമാക്കിയത്.

നേരത്തെ ബാഴ്സലോണാ മാനേജ്മെന്റുമായി മെസ്സി അകന്നിരുന്നു. മാനേജ്മെന്റ് തീരുമാനങ്ങള്‍ക്കെതിരേയും പുതിയ കോച്ചിനെതിരേയും മെസ്സി ശബ്ദിച്ചിരുന്നു. ഇതെത്തുടര്‍ന്ന് താരം ക്ലബ്ബ് വിടുമെന്ന തരത്തില്‍ റിപോര്‍ട്ടുകളുണ്ടായിരുന്നു. താരം മാഞ്ചസ്റ്റര്‍ സിറ്റിയിലേക്ക് പോവുമെന്ന തരത്തിലുള്ള റിപോര്‍ട്ടുകളുണ്ടായിരുന്നു.