സാവിയുടെ ബാഴ്‌സയിലേക്കുള്ള വരവ് അനിശ്ചിതത്വത്തില്‍

ക്യാംപ് നൗ: ഖത്തര്‍ ക്ലബ്ബ് അല്‍ സാദിന്റെ കോച്ച് സാവി ഹെര്‍ണാണ്ടസിന്റെ ബാഴ്‌സയിലേക്കുള്ള വരവ് അനിശ്ചിതത്തില്‍. സാവിയ്ക്കായി ബാഴ്‌സ ഓഫര്‍ മുന്നോട്ട് വച്ചിട്ടില്ലെന്ന് അല്‍ സാദ് ക്ലബ്ബ് അറിയിച്ചു. സാവിയുമായി അല്‍ സാദ് ക്ലബ്ബിന് രണ്ട് വര്‍ഷത്തെ കൂടി കരാര്‍ ശേഷിക്കുന്നുണ്ട്. സാവിയെ ബാഴ്‌സ സ്വീകരിക്കുന്ന പക്ഷം അല്‍ സാദ് ക്ലബ്ബിന് നഷ്ടപരിഹാരം നല്‍കണം. ബാഴ്‌സ നല്‍കാത്ത പക്ഷം സാവി അല്‍സാദ് ക്ലബ്ബിന് നഷ്ടപരിഹാരം നല്‍കണം. എന്നാല്‍ ബാഴ്‌സ ഇതിന് തയ്യാറല്ലെന്നാണ് റിപ്പോര്‍ട്ട്. അതിനിടെ ബാഴ്‌സ ഇതുവരെ ക്ലബ്ബിനെ സമീപിച്ചിട്ടില്ലെന്നാണ് റിപ്പോര്‍ട്ട്. സാവിയും ഇതേകുറിച്ച് പ്രതികരിച്ചിട്ടില്ല. നിലവില്‍ ഖത്തര്‍ ലീഗില്‍ മുന്നിലുള്ള അല്‍സാദിനെ കിരീടമണിയിക്കുക എന്നതാണ് മുന്‍ ബാഴ്‌സാ താരമായ സാവിയുടെ ലക്ഷ്യമെന്നും സാവി അതിനുള്ള തയ്യാറെടുപ്പിലാണെന്നും അല്‍സാദ് ക്ലബ്ബ് അറിയിച്ചു. തന്റെ ജോലിയിലാണ് ശ്രദ്ധ കേന്ദ്രീകരിക്കുന്നതെന്നും താന്‍ ബാഴ്‌സയുമായി ഇതുവരെ ചര്‍ച്ച നടത്തിയിട്ടില്ലെന്നും സാവി അറിയിച്ചു.