2026 ഫിഫ ലോകകപ്പ് മല്‍സരക്രമം ഇന്നറിയാം; ലൈവ് ഫിഫാ യൂട്യൂബില്‍ കാണാം

ന്യൂയോര്‍ക്ക്: അടുത്ത വര്‍ഷത്തെ ഫിഫ ലോകകപ്പിന്റെ മല്‍സരക്രമം ഇന്നറിയാം. വാഷിങ്ടണില്‍ ഇന്ത്യന്‍ സമയം രാത്രി പത്തരയ്ക്കാണ് ഗ്രൂപ്പ് ഘട്ട നറുക്കെടുപ്പ് തുടങ്ങുക. ചരിത്രത്തില്‍ ആദ്യമായി 48 ടീമുകള്‍ പങ്കെടുക്കുന്ന ഫിഫ ലോകകപ്പിന്റെ ഗ്രൂപ്പ് ഘട്ട നറുക്കെടുപ്പാണ് വാഷിംങ്ടണിലെ കെന്നഡി സെന്ററില്‍ നടക്കുക. ഫിഫ ഡോട്ട് കോമിലും ഫിഫ യൂട്യൂബ് ചാനലിലും നറുക്കെടുപ്പ് തല്‍സമയം കാണാനാവും.

അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ സാന്നിധ്യത്തിലാവും ടീമുകളുടെ ഗ്രൂപ്പ്ഘട്ട നറുക്കെടുപ്പ്. കംപ്യൂട്ടറിന്റെ സഹായത്തോടെയാണ് നറുക്കെടുപ്പ്. ഫിഫ റാങ്കിങിന്റെ അടിസ്ഥാനത്തില്‍ നാല് പോട്ടുകളില്‍ പന്ത്രണ്ട് ടീമുകള്‍ വീതം. നാല് പോട്ടുകളിലേയും ഓരോ ടീമുകള്‍ പന്ത്രണ്ട് ഗ്രൂപ്പുകളില്‍ എത്തും. ആതിഥേയരായ കാനഡ, മെക്‌സിക്കോ, അമേരിക്ക എന്നിവര്‍ക്കൊപ്പം സ്‌പെയിന്‍, അര്‍ജന്റീന, ഫ്രാന്‍സ്, ഇംഗ്ലണ്ട്, പോര്‍ച്ചുഗല്‍, ബ്രസീല്‍, നെതര്‍ലന്‍ഡ്‌സ്, ബെല്‍ജിയം, ജര്‍മ്മനി എന്നിവരാണ് ഒന്നാം പോട്ടിലുളളത്.

പോട്ട് രണ്ടില്‍ ക്രൊയേഷ്യ, മൊറോക്കോ, കൊളംബിയ, ഉറുഗ്വേ, സ്വിറ്റ്‌സര്‍ലന്‍ഡ്, ജപ്പാന്‍, സെനഗല്‍, ഇറാന്‍, കൊറിയ റിപ്പബ്ലിക്, ഇക്വഡോര്‍, ഓസ്ട്രിയ, ഓസ്ട്രേലിയ ടീമുകളാണുള്ളത്.മൂന്നാമത്തെ പോട്ടില്‍ നോര്‍വേ, പനാമ, ഈജിപ്ത്, അള്‍ജീരിയ, സ്‌കോട്ട്‌ലന്‍ഡ്, പരാഗ്വേ, ടുണീഷ്യ, ഐവറി കോസ്റ്റ്, ഉസ്‌ബെക്കിസ്ഥാന്‍, ഖത്തര്‍, സൗദി അറേബ്യ, ദക്ഷിണാഫ്രിക്ക ടീമുകളും പോട്ട് പോട്ട് നാലില്‍ ജോര്‍ദാന്‍, കാബോ വെര്‍ഡെ, ഘാന, കുറസാവോ, ഹെയ്തി, ന്യൂസിലന്‍ഡ്, യൂറോപ്യന്‍ പ്ലേഓഫ് എ, ബി, സി, ഡി, ഫിഫ പ്ലേ ഓഫ് ടൂര്‍ണമെന്റ് 1,2 ടീമുകളാണുള്ളത്.

ഫിഫ റാങ്കിങിലെ ഒന്നും രണ്ടുംസ്ഥാനക്കാരായ സ്‌പെയ്‌നും അര്‍ജന്റീനയും മൂന്നും നാലും സ്ഥാനക്കാരായ ഫ്രാന്‍സും ഇംഗ്ലണ്ടും ഫൈനലിന് മുന്‍പ് നേര്‍ക്കുനേര്‍ വരാത്തവിധം ആയിരിക്കും നറുക്കെടുപ്പ്. ബ്രസിലും അര്‍ജന്റീനയും ഉള്‍പ്പെട്ട കോണ്‍മബോള്‍ മേഖലയിലെ രണ്ട് ടീമുകള്‍ ഒരേ ഗ്രൂപ്പിലുണ്ടാവില്ല. നാലു ടീമുകള്‍ വീതമുള്ള 12 ഗ്രൂപ്പുകളിലായിട്ടായിരിക്കും ടൂര്‍ണമെന്റ് നടക്കുക.

നറുക്കെടുപ്പിന് മുന്‍പും ശേഷവും സംഗീത വിരുന്നുണ്ടാവും. ജൂണ്‍ ജൂണ്‍ 11 മുതല്‍ ജൂലൈ 19 വരെ നടക്കുന്ന ലോകകപ്പില്‍ കളിക്കേണ്ട 48 ടീമുകളില്‍ നാല്‍പ്പത്തിരണ്ടും യോഗ്യത നേടിക്കഴിഞ്ഞു. ബാക്കിയുളള ആറ് ടീമുകള്‍ പ്ലേ ഓഫിലൂടെ ലോകകപ്പിന് എത്തും.