വനിതാ ക്രിക്കറ്റ് താരങ്ങളെ അനുമോദിച്ച ട്വീറ്റ്; ഗാംഗുലിക്കെതിരേ ആരാധകര്‍

മുംബൈ: കോമണ്‍വെല്‍ത്ത് ഗെയിംസില്‍ ഓസ്‌ട്രേലിയയോട് പരാജയപ്പെട്ട് വെള്ളി മെഡല്‍ കരസ്ഥമാക്കിയ ഇന്ത്യന്‍ വനിതാ ക്രിക്കറ്റ് ടീമിനെ അഭിനന്ദിച്ച് ട്വിറ്ററില്‍ പോസ്റ്റിട്ട ബിസിസിഐ പ്രസിഡന്റ് സൗരവ് ഗാംഗുലിക്കെതിരേ ആരാധകര്‍. ടീമിനെ അഭിനന്ദിച്ച ഗാംഗുലിയുടെ ട്വീറ്റ് ഇങ്ങനെ ആയിരുന്നു. 'വെള്ളി നേടിയ ടീമംഗങ്ങള്‍ക്ക് ആശംസ. ഇന്നത്തെ കളി അവരുടേതായിരുന്നു.ആ നിരാശയിലായിരിക്കും അവര്‍ വീട്ടിലേക്ക് മടങ്ങുന്നത്.' ഈ ടീറ്റിനെതിരേയാണ് വനിതാ ടീം ആരാധകര്‍ രംഗത്തെത്തിയിരിക്കുന്നത്. വെള്ളി നേടിയ ടീമിനെ നിരാശരാക്കുന്നതാണ് ഗാംഗുലിയുടെ പോസ്‌റ്റെന്ന് ആരാധകര്‍ കുറിക്കുന്നു. നിങ്ങളാണ് ഏറ്റവും വലിയ നിരാശയെന്നും ആരാധകര്‍ കുറിച്ചു. നിരവധി പോസ്റ്റുകളാണ് മുന്‍ ഇന്ത്യന്‍ ക്യാപ്റ്റനായ ഗാംഗുലിക്കെതിരേ വന്നത്. മികച്ച പ്രകടനമാണ് ഇന്ത്യ നടത്തിയത്. നിര്‍ഭാഗ്യമാണ് തോല്‍വിക്ക് കാരണമെന്നായിരുന്നു ഒരു പോസ്റ്റ്. വനിതാ ക്രിക്കറ്റിനെ പ്രോല്‍സാഹിപ്പിക്കുന്ന തരത്തിലുള്ള ലീഗുകള്‍ രംഗത്ത് വരാത്തതിനെതിരേയും പോസ്റ്റുകള്‍ ഉണ്ടായിരുന്നു. അതിനിടെ ഇന്ത്യന്‍ പുരുഷ ക്രിക്കറ്റ് താരങ്ങളൊന്നും ഈ ട്വിറ്റിന് പ്രതികരിച്ചിട്ടില്ല.