ദക്ഷിണാഫ്രിക്കക്കെതിരായ ഏകദിന പരമ്പരക്കുള്ള ഇന്ത്യ എ ടീമിലും സഞ്ജുവിന് ഇടമില്ല; തിലക് വര്‍മ്മ ക്യാപ്റ്റന്‍

മുംബൈ: ദക്ഷിണാഫ്രിക്ക എ ടീമിനെതിരായ ഏകദിന പരമ്പരക്കുള്ള ഇന്ത്യ എ ടീമിനെ പ്രഖ്യാപിച്ചു. മലയാളി താരം സഞ്ജു സാംസണെ ഏകദിന പരമ്പയിലേക്കുള്ള ടീമിന്റെ നായകനാക്കുമെന്ന് നേരത്തെ റിപ്പോര്‍ട്ടുകളുണ്ടായിരുന്നെങ്കിലും ശ്രേയസ് അയ്യരുടെ അഭാവത്തില്‍ തിലക് വര്‍മയാണ് ദക്ഷിണാഫ്രിക്ക എക്കെതിരായ ഏകദിന പരമ്പരയില്‍ ഇന്ത്യയെ നയിക്കുക. ചെന്നൈ സൂപ്പര്‍ കിംഗ്‌സ് ക്യാപ്റ്റനായ റുതുരാജ് ഗെയ്ക്വാദാണ് വൈസ് ക്യാപ്റ്റന്‍. മുന്‍ നായകന്‍മാരായ വിരാട് കോഹ്‌ലിയെയും രോഹിത് ശര്‍മയെയും ഇന്ത്യ എ ടീമിലേക്ക് പരിഗണിച്ചില്ല.

ദക്ഷിണാഫ്രിക്കക്കെതിരായ ഏകദിന പരമ്പരക്ക് മുമ്പ് മത്സരപരിചയം കിട്ടാനായി ഇരുവരെയും എ ടീമില്‍ ഉള്‍പ്പെടുത്തിയേക്കുമെന്ന് നേരത്തെ റിപ്പോര്‍ട്ടുണ്ടായിരുന്നു. വിക്കറ്റ് കീപ്പറായി ഇഷാന്‍ കിഷനെയാണ് ഏകദിന ടീമിലെടുത്തിരിക്കുന്നത്. പഞ്ചാബ് കിങ്‌സ് താരം പ്രഭ്‌സിമ്രാന്‍ സിംഗാണ് ടീമിലെ രണ്ടാം വിക്കറ്റ് കീപ്പര്‍. ഓസ്‌ട്രേലിയക്കെതിരായ ടി20 പരമ്പരയില്‍ കളിക്കുന്ന തിലക് വര്‍മക്ക് പുറമെ അര്‍ഷ്ദീപ് സിംഗ്, അഭിഷേക് ശര്‍മ, ഹര്‍ഷിത് റാണ എന്നിവരെയും ടീമിലേക്ക് പരിഗണിച്ചപ്പോള്‍ ഏകദിനങ്ങളില്‍ മികച്ച റെക്കോര്‍ഡുള്ള സഞ്ജുവിനെ വിക്കറ്റ് കീപ്പറായി പരിഗണിക്കാതിരുന്നത് അപ്രതീക്ഷിതമായി.റൈസിംഗ് സ്റ്റാര്‍സ് ഏഷ്യാ കപ്പിനുള്ള ഇന്ത്യന്‍ ടീമിലേക്കും സഞ്ജുവിനെ സെലക്ടര്‍മാര്‍ പരിഗണിച്ചിരുന്നില്ല. ജിതേഷ് ശര്‍മയാണ് റൈസിംഗ് സ്റ്റാര്‍സ് ഏഷ്യാ കപ്പില്‍ ഇന്ത്യയെ നയിക്കുന്നത്.

ഇന്ത്യന്‍ എ ടീം

തിലക് വര്‍മ്മ (സി), റുതുരാജ് ഗെയ്ക്വാദ് (വിസി), അഭിഷേക് ശര്‍മ്മ, റിയാന്‍ പരാഗ്, ഇഷാന്‍ കിഷന്‍ (ഡബ്ല്യുകെ), ആയുഷ് ബദോണി, നിഷാന്ത് സിന്ധു, വിപ്രജ് നിഗം, മാനവ് സുത്താര്‍, ഹര്‍ഷിത് റാണ, അര്‍ഷ്ദീപ് സിംഗ്, പ്രസിദ്ധ് കൃഷ്ണ, ഖലീല്‍ അഹമ്മദ്, പ്രഭ്‌സിമ്രാന്‍ സിങ്്.