ഐസിസി ട്വന്റി-20 റാങ്കിങ്; ബാറ്റിങില്‍ ആദ്യ രണ്ട് സ്ഥാനങ്ങളില്‍ അഭിഷേക് ശര്‍മയും തിലക് വര്‍മയും

ദുബായ്: ട്വന്റി-20 ബാറ്റിങ് റാങ്കിങില്‍ ആദ്യ രണ്ട് സ്ഥാനങ്ങള്‍ ഇന്ത്യയുടെ അഭിഷേക് ശര്‍മയും തിലക് വര്‍മയും നിലനിര്‍ത്തി. 829 റേറ്റിങ് പോയിന്റുമായാണ് അഭിഷേക് ഒന്നാം സ്ഥാനം നിലനിര്‍ത്തിയത്. 804 റേറ്റിങ് പോയിന്റുമായാണ് തിലക് വര്‍മ രണ്ടാം സ്ഥാനത്തുള്ളത്. ബാറ്റിങ് റാങ്കിംഗില്‍ ആദ്യ പത്തില്‍ ആറാം സ്ഥാനത്ത് ഇന്ത്യന്‍ നായകന്‍ സൂര്യകുമാര്‍ യാദവുമുണ്ട്. 11-ാം സ്ഥാനത്തുള്ള യശസ്വി ജയ്‌സ്വാളാണ് ബാറ്റിംഗ് റാങ്കിങില്‍ മുന്നിലുള്ള മറ്റൊരു ഇന്ത്യന്‍ താരം. മലയാളി താരം സഞ്ജു സാംസണ്‍ ഒരു സ്ഥാനം ഉയര്‍ന്ന് 34-ാം സ്ഥാനത്തെത്തിയപ്പോള്‍ ഏഷ്യാ കപ്പ് ടീമിലില്ലാത്ത റുതുരാജ് ഗെയ്ക്വാദ് ഒരു സ്ഥാനം മെച്ചപ്പെടുത്തി 26-ാം സ്ഥാനത്തെത്തി.

ബൗളിംങ്് റാങ്കിങില്‍ നാലാം സ്ഥാനത്തുള്ള വരുണ്‍ ചക്രവര്‍ത്തിയാണ് ഇന്ത്യന്‍ താരങ്ങളില്‍ ഒന്നാമത്. ന്യൂസിലന്‍ഡ് പേസര്‍ ജേക്കബ് ടഫി ഒന്നാം സ്ഥാനത്തുള്ള റാങ്കിങില്‍ ഇംഗ്ലണ്ടിന്റെ ആദില്‍ റഷീദ് രണ്ടാമതും വെസ്റ്റ് ഇന്‍ഡീസിന്റെ അക്കീല്‍ ഹൊസൈന്‍ മൂന്നാമതുമാണ്. ഏഷ്യാ കപ്പ് ടീമിലില്ലെങ്കിലും ഇന്ത്യന്‍ സ്പിന്നര്‍ രവി ബിഷ്‌ണോയ് ഒരു സ്ഥാനം മെച്ചപ്പെടുത്തി ആറാം സ്ഥാനത്തത്തെയിപ്പോള്‍ ഏഷ്യാ കപ്പ് ടീമിലുള്ള അര്‍ഷ്ദീപ് സിംഗ് ഒരു സ്ഥാനം ഉയര്‍ന്ന് ഒമ്പതാം സ്ഥാനത്തെത്തിയതാണ് മറ്റൊരു ശ്രദ്ധേയമാറ്റം. ഏഷ്യാ കപ്പ് ടീമിലുള്ള അക്‌സര്‍ പട്ടേല്‍ ഒരു സ്ഥാനം ഉയര്‍ന്ന് പതിമൂന്നാം സ്ഥാനത്തുമെത്തി.

ഓള്‍ റൗണ്‍മാരുടെ റാങ്കിങില്‍ ഇന്ത്യയുടെ ഹാര്‍ദ്ദിക് പാണ്ഡ്യ ഒന്നാം സ്ഥാനം നിലനിര്‍ത്തിയപ്പോള്‍ അഫ്ഗാനിസ്ഥാന്‍ താരം മുഹമ്മദ് നബിയാണ് രണ്ടാമത്.