നാഗ്പൂരില്‍ ഗില്‍-അയ്യര്‍-പട്ടേല്‍ ഷോ; ഇന്ത്യയ്ക്ക് വിജയതുടക്കം

നാഗ്പൂര്‍: ഇംഗ്ലണ്ടിനെതിരായ ഏകദിന പരമ്പരയിലെ ആദ്യ മല്‍സരത്തില്‍ ഇന്ത്യയ്ക്ക് വിജയം. നാഗ്പൂരില്‍ നടന്ന മല്‍സരത്തില്‍ നാല് വിക്കറ്റ് ജയമാണ് ഇന്ത്യ സ്വന്തമാക്കിയത്. ഇംഗ്ലണ്ട് ഉയര്‍ത്തിയ 249 റണ്‍സ് വിജയലക്ഷ്യം 38.4 ഓവറില്‍ ആറ് വിക്കറ്റ് നഷ്ടത്തില്‍ ഇന്ത്യ മറികടന്നു. ശുഭ്മാന്‍ ഗില്‍ (87), ശ്രേയസ് അയ്യര്‍ (59), അക്സര്‍ പട്ടേല്‍ (52) എന്നിവരുടെ അര്‍ധ സെഞ്ചുറികളാണ് ഇന്ത്യയുടെ വിജയത്തില്‍ നിര്‍ണായകമായത്. വിജയത്തോടെ മൂന്ന് മത്സരങ്ങളടങ്ങിയ പരമ്പരയില്‍ 1-0ത്തിന് ഇന്ത്യ മുന്നിലെത്തി.

ടോസ് നേടി ബാറ്റിങ് തിരഞ്ഞെടുത്ത ഇംഗ്ലണ്ട് 249 റണ്‍സിന് പുറത്തായിരുന്നു.ഇംഗ്ലണ്ടിനായി ബേഥേല് (51), ബട്ലര്‍ (52) എന്നിവര്‍ അര്‍ദ്ധസെഞ്ചുറി നേടി. ഫില്‍ സാള്‍ട്ട് 43 ഉം ഡക്കറ്റ് 32 റണ്‍സ് നേടി. 47.4 ഓവറിലാണ് ഇംഗ്ലണ്ട് ഇന്നിങ്സ് അവസാനിച്ചത്. അരങ്ങേറ്റക്കാരനായ ഹര്‍ഷിത റാണ ഇന്ത്യയ്ക്കായി മൂന്ന് വിക്കറ്റ് നേടി. എന്നാല്‍ താരം ഏഴ് ഓവറില്‍ 53 റണ്‍സ് വിട്ടുകൊടുത്തിരുന്നു. ജഡേജ മൂന്ന് വിക്കറ്റ് നേടി.