പാക് താരം നസീം ഷായുടെ കുടുംബ വീടിനു നേരെ വെടിവയ്പ്പ്; അഞ്ചു പേര്‍ കസ്റ്റഡിയില്‍

ഇസ്ലാമാബാദ്: പാകിസ്താന്‍ പേസര്‍ നസീം ഷായുടെ കുടുംബ വീടിനു നേരെ അജ്ഞാതര്‍ വെടിയുതിര്‍ത്തു. ഖൈബര്‍ പഖ്തുന്‍ഖ്വയിലുള്ള താരത്തിന്റെ വീടിനു നേരെയാണ് വെടിവയ്പ്പുണ്ടായത്. ആര്‍ക്കും പരുക്കേറ്റിട്ടില്ലെന്നാണ് വിവരം. സംഭവവുമായി ബന്ധപ്പെട്ട് അഞ്ചു പേരെ പോലിസ് കസ്റ്റഡിയിലെടുത്തിട്ടുണ്ട്.

നിലവില്‍ ശ്രീലങ്കയ്‌ക്കെതിരേ ഏകദിനം കളിച്ചുകൊണ്ടിരിക്കുകയാണ് താരം. നസീമും അദ്ദേഹത്തിന്റെ മിക്ക കുടുംബാംഗങ്ങളും നിലവില്‍ ഇസ്ലാമാബാദിലാണ് താമസിക്കുന്നത്. എന്നാല്‍ ലോവര്‍ ദിറില്‍ താമസിച്ചിരുന്ന അടുത്ത ബന്ധുക്കളാണ് കുടുംബ വീട്ടില്‍ താമസിച്ചിരുന്നത്. സ്ഥിതിഗതികള്‍ നിയന്ത്രണവിധേയമായതിനാല്‍ ആദ്യം ഏകദിനം നടക്കുന്ന റാവല്‍പിണ്ടിയില്‍ തന്നെ നസീം ഷാ തുടര്‍ന്നേക്കും.