ചെന്നൈയില്‍ ഇന്ത്യ തകര്‍ന്നു; ഇംഗ്ലണ്ടിന് 227 റണ്‍സ് ജയം

ചെന്നൈ; ഇംഗ്ലണ്ടിനെതിരായ ആദ്യ ടെസ്റ്റില്‍ ഇന്ത്യക്ക് വന്‍ തോല്‍വി.420 റണ്‍സിന്റെ ലക്ഷ്യവുമായിറങ്ങിയ ഇന്ത്യ 192 റണ്‍സിന് പുറത്താവുകയായിരുന്നു. 227 റണ്‍സിന്റെ ജയമാണ് സന്ദര്‍ശകര്‍ നേടിയത്. അവസാന ദിനമായ ഇന്ന് 39-1 എന്ന നിലയില്‍ ബാറ്റിങ് തുടങ്ങിയ ഇന്ത്യക്ക് ആദ്യമേ തകര്‍ച്ചയായിരുന്നു. ആദ്യ സെഷനില്‍ ആന്‍ഡേഴ്‌സണ്‍ ഇന്ത്യന്‍ ബാറ്റിങിനെ പിടിച്ചുകെട്ടിയപ്പോള്‍ ലീഷ് രണ്ടാം സെഷനില്‍ തകര്‍ച്ച പൂര്‍ത്തിയാക്കി. ക്യാപ്റ്റന്‍ വിരാട് കോഹ്‌ലി (72), ശുഭ്മാന്‍ ഗില്‍ (50), എന്നിവര്‍ ഇന്ത്യന്‍ നിരയില്‍ പിടിച്ചു നിന്നെങ്കിലും പിന്നീട് വന്നവര്‍ ഇംഗ്ലണ്ട് ബൗളിങിന് മുന്നില്‍ തകരുകയായിരുന്നു. ചേതേശ്വര്‍ പൂജാര( 15), രഹാനെ (0), ഋഷഭ് പന്ത്(11), വാഷിങ്ടണ്‍ സുന്ദര്‍(0) എന്നിവര്‍ക്ക് ഇന്ന് ഇന്ത്യന്‍ സ്‌കോര്‍ബോര്‍ഡ് ചലിപ്പിക്കാന്‍ കഴിഞ്ഞില്ല. അശ്വിന്‍ (9), ഷഹബാസ് നദീം (0), ഇഷാന്ത് ശര്‍മ്മ (5), ജസ്പ്രീത് ബുംറ(4) എന്നിവര്‍ക്ക് കാര്യമായ ചലനം സൃഷ്ടിക്കാന്‍ കഴിഞ്ഞില്ല. ഇംഗ്ലണ്ടിനായി ആന്‍ഡേഴ്‌സണ്‍ നാലും ലീഷ് മൂന്നും വിക്കറ്റ് നേടി.