സന്ദര്‍ശക വിസ കാലാവധി കഴിഞ്ഞവര്‍ക്ക് മടങ്ങിപോകാന്‍ 30 ദിവസം അധികമായി അനുവദിച്ച് സൗദി

റിയാദ്: സന്ദര്‍ശക വിസയിലെത്തി (വിസിറ്റ് വിസ), കാലാവധി കഴിഞ്ഞു സൗദിയില്‍ താമസിക്കുന്ന വിദേശികള്‍ക്ക് നാട്ടിലേക്ക് മടങ്ങിപോകാന്‍ 30 ദിവസം കൂടുതലായി നല്‍കുമെന്ന് സൗദി അധികൃതര്‍ അറിയിച്ചു.

എല്ലാ വിഭാഗത്തിലുമുള്ള സന്ദര്‍ശക വിസക്കാര്‍ക്കും ഈ അധിക സമയം (ഗ്രേസ് പിരീഡ്) ബാധകമാകുമെന്ന് ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട്‌സ് അറിയിച്ചു. ഇളവിനുള്ള കാലാവധി ജൂലൈ 27 മുതല്‍ നടപ്പില്‍ വന്നു. എന്നാല്‍, സൗദിയിലെ നിയമനുസരിച്ച് നിലവിലുള്ള പിഴയും മറ്റ് ഫീസുകളും അടച്ച ശേഷം മാത്രമേ ഇവര്‍ക്ക് മടങ്ങിപോകാനാവുകയുള്ളൂ.

ആഭ്യന്തര മന്ത്രാലയത്തിന്റെ ഡിജിറ്റല്‍ പ്ലാറ്റ്‌ഫോമായ 'അബ്‌ഷെറി' (അയവെലൃ) ലെ 'തവാസുല്‍' സേവനം വഴി യോഗ്യരായ വ്യക്തികള്‍ക്ക് യാത്രാ അപേക്ഷ സമര്‍പ്പിക്കാമെന്ന് ഡയറക്ടറേറ്റ് പറഞ്ഞു. നിര്‍ദ്ദിഷ്ട സമയപരിധിക്കുള്ളില്‍ യാത്രാ ക്രമീകരണങ്ങള്‍ ഒരുക്കുന്നതിനും കൂടുതല്‍ പിഴകള്‍ ഒഴിവാക്കുന്നതിനും സന്ദര്‍ശക വിസയില്‍ വന്നവര്‍ ഈ സംവിധാനം ഉപയോഗിക്കണമെന്ന് ഉദ്യോഗസ്ഥര്‍ അറിയിച്ചു.

ജൂണില്‍ ആദ്യമായി അവതരിപ്പിച്ച ഈ പദ്ധതി, മടങ്ങിപോകല്‍ നടപടിക്രമങ്ങള്‍ കാര്യക്ഷമമാക്കുന്നതിനും രാജ്യത്തിന്റെ റെസിഡന്‍സി, ഇമിഗ്രേഷന്‍ നിയമങ്ങള്‍ പാലിക്കുന്നത് പ്രോത്സാഹിപ്പിക്കുന്നതിനും ലക്ഷ്യമിടുന്നു. കഴിഞ്ഞ മാസം (ജൂണ്‍) 26 മുതല്‍ പ്രാബല്യത്തില്‍ വന്ന ഈ നടപടി പ്രകാരം, കാലാവധി കഴിഞ്ഞും രാജ്യത്ത് തങ്ങുന്ന വിവിധ തരത്തിലുള്ള വിസകള്‍ക്ക് ( സിംഗിള്‍, മള്‍ട്ടിപ്പിള്‍ എന്‍ട്രി), നാട്ടിലേക്ക് മടങ്ങാന്‍ പിഴയും അഡ്മിനിസ്‌ട്രേറ്റീവ് ഫീസും അടയ്ക്കുന്നതിന് 30 ദിവസത്തെ അധിക സമയം (ഗ്രേസ് പിരീഡ്) പ്രഖ്യാപിച്ചിരുന്നു.

വിസ കാലാവധിക്ക് ശേഷം രാജ്യത്ത് തുടരുന്ന സന്ദര്‍ശകരുടെ താമസം നിയന്ത്രിക്കുന്നതിനും സുഗമമായ തിരിച്ചുപോകല്‍ പ്രക്രിയകള്‍ ഉറപ്പാക്കുന്നതിനുമുള്ള സൗദി അറേബ്യയുടെ ശ്രമത്തിന്റെ ഭാഗമാണ് ഈ നടപടി.