കുവൈത്തില്‍ കൊറോണ ബാധിച്ച് ഒരു മലയാളി കൂടി മരിച്ചു

കുവൈത്ത് സിറ്റി: കുവൈത്തില്‍ കൊറോണ വൈറസ് ബാധിച്ച് ചികില്‍സയില്‍ കഴിഞ്ഞിരുന്ന ഒരു മലയാളി കൂടി മരിച്ചു. കോഴിക്കോട് കുന്ദമംഗലം പുത്തൂര്‍മഠം മീത്തല്‍പറമ്പ് സ്വദേശി ഫാത്തിമ മന്‍സില്‍ അഹമ്മദ് ഇബ്രാഹിമാണ് (57) ഇന്ന് പുലര്‍ച്ചെ മരിച്ചത്. രോഗബാധയേറ്റ് ചികില്‍സയിലായിരുന്ന ഇദ്ദേഹത്തെ കഴിഞ്ഞദിവസമാണു ജാബിര്‍ ആശുപത്രിയിലെ തീവ്രപരിചരണവിഭാഗത്തില്‍ പ്രവേശിപ്പിച്ചത്.

സ്വകാര്യസ്ഥാപനത്തില്‍ സ്റ്റോര്‍ കീപ്പറായി ജോലിചെയ്തുവരികയായിരുന്നു. ഭാര്യ: ഇമ്പിച്ചി ബീവി. മക്കള്‍: ഉമ്മര്‍കോയ, ഫാത്തിമത്ത് സുഹ്റ, ആയിഷ ഫര്‍ഹത്ത്. മരുമക്കള്‍: മുജീബ് മാത്തോട്ടം, നൗഫല്‍ കാരന്തൂര്‍. കൊറോണ ബാധയെത്തുടര്‍ന്ന് രാജ്യത്ത് ഇതുവരെയായി 40 പേരാണു മരിച്ചത്. ഇവരില്‍ 15 പേര്‍ ഇന്ത്യക്കാരാണ്. മരിച്ച ഇന്ത്യക്കാരില്‍ ഇതുവരെ നാലുപേര്‍ മലയാളികളാണെന്ന് തിരിച്ചറിഞ്ഞിട്ടുണ്ട്.