വനിതാ ഐപിഎസ് ട്രെയിനിക്ക് നേരെ അതിക്രമം; ബൈക്ക് യാത്രികനെ തേടി പോലിസ്

തിരുവനന്തപുരം: കോവളത്തിന് സമീപം പ്രഭാത സവാരിക്കിടെ വനിതാ ഐപിഎസ് ട്രെയിനിക്ക് നേരെ അതിക്രമം. ബൈക്ക് യാത്രക്കാരനായ യുവാവിനായി പോലിസ് തിരച്ചിൽ വ്യാപകമാക്കി. ഐപിഎസ് ട്രെയിനിക്കെതിരെ ഉണ്ടായത് മാല പൊട്ടിക്കൽ ശ്രമം മാത്രമെന്ന് സിറ്റി പോലിസ് അറിയിച്ചു. ഇതിനെതിരെ കേസ് എടുത്ത് അന്വേഷണം ആരംഭിച്ചിട്ടുണ്ട്.

കോവളം പാച്ചല്ലൂര്‍- കൊല്ലന്തറ സര്‍വീസ് റോഡില്‍ ഇന്ന് രാവിലെയാണ് സംഭവം. രാവിലെ പ്രഭാത നടത്തിനിടെയായിരുന്നു സംഭവം. ബൈപ്പാസിന്റെ വശത്തുളള സര്‍വ്വീസ് റോഡിലൂടെ നടക്കുകയായിരുന്ന വനിതാ ഓഫീസറെ ബൈക്കില്‍ പിന്തുടര്‍ന്നെത്തിയ യുവാവ് സമീപമെത്തി ബൈക്കിന്റെ വേഗത കുറച്ചശേഷം ഉപദ്രവിക്കാന്‍ ശ്രമിച്ചു. ബഹളം വച്ച്‌ ബൈക്കിന്റെ പിന്നാലെ ഇവര്‍ ഓടിയെങ്കിലും യുവാവ് രക്ഷപ്പെട്ടു. സംഭവത്തില്‍ കേസ് രജിസ്റ്റര്‍ ചെയ്ത പോലിസ് ബൈക്കിന്റെ നമ്പർ കേന്ദ്രീകരിച്ച്‌ അന്വേഷണം ആരംഭിച്ചു.