കേന്ദ്രബജറ്റ് സംസ്ഥാനത്തിന്റെ ന്യായമായ ആവശ്യങ്ങളെ തീര്ത്തും അവഗണിച്ചു: മുഖ്യമന്ത്രി
പ്രകൃതിക്ഷോഭ സഹായധനം ഇതരസംസ്ഥാനങ്ങള്ക്ക് വീതിച്ചുനല്കിയപ്പോള് കേരളത്തെ അതിരൂക്ഷമായ പ്രളയക്കെടുതിയുണ്ടായ സംസ്ഥാനമായിട്ടുകൂടി ഒഴിവാക്കിയത് കഴിഞ്ഞ മാസത്തിലാണ്. അതേ രാഷ്ട്രീയമനോഭാവമാണ് കേരളത്തിന്റെ കാര്യത്തില് ബജറ്റിലുള്ളത്.
തിരുവനന്തപുരം: സംസ്ഥാനത്തിന്റെ ന്യായമായ ആവശ്യങ്ങളെ തീര്ത്തും അവഗണിച്ചിരിക്കുകയാണ് കേന്ദ്രബജറ്റെന്ന് മുഖ്യമന്ത്രി പിണറായി വിജയന്. കേന്ദ്രനികുതിയില്നിന്നുള്ള സംസ്ഥാത്തിന്റെ ഓഹരിയില് വലിയതോതിലുള്ള ഇടിവുവരുന്നു എന്നത് ഉല്ക്കണ്ഠാജനകമാണ്. എത്ര ഭീമമാണ് ഇടിവ് എന്നത് വ്യക്തമാവാനിരിക്കുന്നതേയുള്ളൂ. പ്രകൃതിക്ഷോഭ സഹായധനം ഇതരസംസ്ഥാനങ്ങള്ക്ക് വീതിച്ചുനല്കിയപ്പോള് കേരളത്തെ അതിരൂക്ഷമായ പ്രളയക്കെടുതിയുണ്ടായ സംസ്ഥാനമായിട്ടുകൂടി ഒഴിവാക്കിയത് കഴിഞ്ഞ മാസത്തിലാണ്. അതേ രാഷ്ട്രീയമനോഭാവമാണ് കേരളത്തിന്റെ കാര്യത്തില് ബജറ്റിലുള്ളത്.
പൊതുമേഖലാ സ്ഥാപനങ്ങള് കൂടുതലായി വിറ്റഴിക്കാനുള്ള നിര്ദേശങ്ങളടങ്ങിയ കേന്ദ്ര ബജറ്റ് കേരളത്തിലെ കൊച്ചിന് ഷിപ്പ്യാര്ഡ്, റിഫൈനറി പോലുള്ളവയ്ക്ക് അതിജീവിക്കാനാവശ്യമായ പണം വകയിരുത്തിയിട്ടില്ല. എന്നു മാത്രമല്ല, നിലവിലുള്ളതിനെ അപേക്ഷിച്ചുപോലും പലരംഗങ്ങളിലും വെട്ടിക്കുറവാണ് വരുത്തിയിട്ടുള്ളത്. ജിഎസ്ടി കാര്യത്തില് അര്ഹമായ വിഹിതം നിരന്തരം നിഷേധിക്കുന്ന കേന്ദ്രം, കൃഷിഭൂമി രംഗങ്ങളില് സംസ്ഥാനത്തിന്റെ അധികാരാവകാശങ്ങള് ഫെഡറല് സത്തയ്ക്കു വിരുദ്ധമായി കൂടിയതോതില് കവരുന്നതിനുള്ള ശ്രമം നടത്തുന്നുവെന്ന് മുഖ്യമന്ത്രി ചൂണ്ടിക്കാട്ടി.
സെമി ഹൈ സ്പീഡ് കോറിഡോര്, അങ്കമാലി-ശബരി റെയില്പാത, ജിഎസ്ടി നഷ്ടപരിഹാരത്തുക, കടത്തിന്റെ പരിധി ഉയര്ത്തല്, റബ്ബര് സബ്സിഡി ഉയര്ത്തല്, കേരളത്തിന് ഒരു എയിംസ്, ഫാക്ട് അടക്കമുള്ള പൊതുമേഖലാ സ്ഥാപനങ്ങള്ക്കുള്ള അധികനിക്ഷേപം, ദേശീയപാതാ വികസനം വേഗത്തിലാക്കല്, ഗള്ഫ് നാടുകളിലെ എംബസികളില് അറ്റാഷെകളുടെ എണ്ണം വര്ധിപ്പിക്കല്, പ്രവാസി പുനരധിവാസം തുടങ്ങി കേരളം സുപ്രധാനമായ എത്രയോ ആവശ്യങ്ങള് മുന്നോട്ടുവച്ചിരുന്നു. വിശദമായ നിവേദനം നല്കിയിരുന്നു. എന്നാല്, അതിനൊന്നും ഒരു പരിഗണനയും നല്കിയില്ലെന്ന് മുഖ്യമന്ത്രി കുറ്റപ്പെടുത്തി.
കോര്പറേറ്റ് നികുതി മേഖലയില് ആവര്ത്തിച്ച് ഇളവുകള് അനുവദിച്ചതും കാര്ഷികോല്പാദനം വര്ധിപ്പിക്കാന് പദ്ധതികളില്ലാത്തതും എല്ഐസിയിലെ സര്ക്കാര് ഓഹരി വിറ്റഴിക്കാന് തീരുമാനിച്ചതും മറ്റും കേന്ദ്രസര്ക്കാരിന്റെ അനുഭാവം ഏതു കൂട്ടരോടാണെന്നതിനു തെളിവുനല്കുന്നുണ്ട്. ആഗോളവല്ക്കരണ നയങ്ങള് വലിയ മാന്ദ്യവും വൈഷമ്യവും ഉണ്ടാക്കിയിട്ടും ശക്തിപ്പെടുത്തി തുടരുക തന്നെ ചെയ്യും എന്നതിന്റെ പ്രഖ്യാപനമാണ് ബജറ്റിലുള്ളത്. ഗ്രാമീണ തൊഴിലുറപ്പുപദ്ധതിയെക്കുറിച്ച് കാര്യമായി ഒന്നു പരാമര്ശിക്കുന്നു പോലുമില്ല ഈ ബജറ്റ് എന്നതും ശ്രദ്ധേയമാണ്.
സമ്പദ്ഘടനയെ ശക്തിപ്പെടുത്തുന്നതോ സാമൂഹ്യസുരക്ഷയെ ഉറപ്പിക്കുന്നതോ വികസനത്തിലേക്കു നയിക്കുന്നതോ അല്ല ഈ ബജറ്റ്, മറിച്ച്, പണപ്പെരുപ്പവും തൊഴിലില്ലായ്മയും വര്ധിപ്പിക്കുന്നതിനു വഴിവയ്ക്കും ഈ ബജറ്റ്. രാജ്യത്തിന്റെ എല്ലാ ഭാഗത്തും സമതുലിതമായ വികസനം ഉറപ്പാക്കേണ്ടതുണ്ട്. എന്നാല്, അതിനു നേര് വിപരീതദിശയിലാണ് ബജറ്റും കേന്ദ്രവും നീങ്ങുന്നത്. സഹകരണ സംഘങ്ങള്ക്കുമേല് 22 ശതമാനം നികുതിയും സര്ച്ചാര്ജും എന്ന കേന്ദ്രബജറ്റിലെ നിര്ദേശം സഹകരണപ്രസ്ഥാനങ്ങള്ക്കും അവയുടെ ആഭിമുഖ്യത്തില് നടക്കുന്ന സാമ്പത്തിക സ്ഥാപനങ്ങള്ക്കും ആപല്ക്കരമാണെന്നും മുഖ്യമന്ത്രി കൂട്ടിച്ചേര്ത്തു.
RELATED STORIES
അനില് ആന്റണിക്കെതിരായ രേഖകളുമായി നന്ദകുമാര്; ശോഭാ സുരേന്ദ്രന് 10...
23 April 2024 8:05 AM GMT10 അനാക്കോണ്ട പാമ്പുകളുമായി ബംഗളൂരു കെംപഗൗഡ വിമാനത്താവളത്തില് യുവാവ്...
23 April 2024 7:18 AM GMTപ്രധാനമന്ത്രിയുടെ രാജസ്ഥാന് വിവാദ പ്രസംഗം: തിരഞ്ഞെടുപ്പ് കമ്മീഷന്...
23 April 2024 7:16 AM GMTപരിശീലനപ്പറക്കലിനിടെ മലേഷ്യന് നാവികസേനയുടെ ഹെലികോപ്റ്ററുകള്...
23 April 2024 7:07 AM GMTലോക്സഭാ തിരഞ്ഞെടുപ്പ്; പരസ്യ പ്രചാരണത്തിന്റെ അവസാന...
23 April 2024 5:57 AM GMTകള്ളവോട്ടിന് ശ്രമിച്ചാല് കര്ശന നടപടി; മുഖ്യ തിരഞ്ഞെടുപ്പ് ഓഫീസര്...
23 April 2024 5:53 AM GMT