ശ്രീറാമിനെ തിരിച്ചെടുക്കുന്ന സർക്കാർ നടപടി നിയമവാഴ്ചയോടുള്ള വെല്ലുവിളി: വി എം സുധീരൻ

തിരുവനന്തപുരം: മാധ്യമപ്രവർത്തകൻ കെ എം ബഷീറിന്റെ അപകട മരണവുമായി ബന്ധപ്പെട്ട് സസ്പെൻഷനിലായിരുന്ന ശ്രീറാം വെങ്കിട്ടറാമിനെ സർവീസിൽ തിരിച്ചെടുക്കുന്ന സർക്കാർ നടപടി നിയമവാഴ്ചയോടുള്ള വെല്ലുവിളിയാണെന്ന് മുൻ കെപിസിസി അധ്യക്ഷൻ വി എം സുധീരൻ. വകുപ്പ്തല അന്വേഷണത്തിന്റെ അടിസ്ഥാനത്തിലാണ് തികച്ചും വിചിത്രമായ ഈ തീരുമാനം എന്നത് ഏവരെയും അത്ഭുതപ്പെടുത്തുന്നതാണ്.

സമൂഹത്തിൽ സ്വാധീനമുള്ളവർക്ക് ഒരു നിയമവും ബാധകമല്ലന്നുള്ള തെറ്റായ സന്ദേശമാണ് ഈ തീരുമാനത്തിലൂടെ സർക്കാർ നൽകുന്നത്. കൊറോണ വ്യാപനം ഉയർത്തുന്ന വൻ ഭീഷണി ചെറുക്കാൻ ജനങ്ങൾ ഒറ്റക്കെട്ടായി മുന്നോട്ടു പോകുന്ന ഈ നിർണായക സന്ദർഭത്തിൽ ഇത്തരത്തിലുള്ള തെറ്റായ തീരുമാനങ്ങൾ ജനങ്ങളിൽ അടിച്ചേൽപ്പിക്കുന്നത് ഇപ്പോൾ രൂപപ്പെട്ട്‌ വന്നിട്ടുള്ള ജനകീയ ഐക്യത്തെ പ്രതികൂലമായി ബാധിക്കാനേ ഇടവരുത്തൂ. - സുധീരൻ ചൂണ്ടിടിക്കാട്ടി.