വള്ളത്തിൽ കപ്പലിടിച്ച് ആറ് മൽസ്യത്തൊഴിലാളികൾക്ക് പരിക്ക്

തിരുവനന്തപുരം: വള്ളത്തിൽ കപ്പലിടിച്ച് പരിക്കേറ്റ ആറ് മൽസ്യത്തൊഴിലാളികളെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പൂന്തുറ സ്വദേശികളായ സഹായ രാജു(52), സഹായം(48), റെയ്മണ്ട് (42), ജയിംസ് (56), സുബിൻ (38), രഞ്ജു (27) എന്നിവരെയാണ് ആശുപത്രിയിൽ പ്രവേശിപ്പിച്ചിരിക്കുന്നത്. ഇന്ന് രാവിലെ ആറോടെ പൂന്തുറയിൽ നിന്നും 16 കിലോമീറ്റർ ഉൾക്കടലിലാണ് അപകടം നടന്നത്. അപകടത്തിൽ വള്ളം രണ്ടായി മുറിഞ്ഞതായി പരിക്കേറ്റവരെ ആശുപത്രിയിലെത്തിച്ചവർ പറഞ്ഞു. പരിക്ക് ഗുരുതരമല്ല. അപകടം നടന്നിട്ടും കപ്പൽ നിർത്താതെ പോവുകയായിരുന്നു. കടലിൽ ചൂണ്ടയിട്ടു കൊണ്ടിരുന്ന മറ്റൊരു വള്ളത്തിലെ തൊഴിലാളികളാണ് ആറു പേരെയും കരയ്ക്കെത്തിച്ചത്.