കഞ്ചാവുകേസില്‍ ഏഴുവര്‍ഷം തടവ് അനുഭവിച്ചയാള്‍ കഞ്ചാവുമായി പിടിയില്‍

മലപ്പുറം: കഞ്ചാവുകേസില്‍ ഏഴുവര്‍ഷം തടവുശിക്ഷ അനുഭവിച്ച ഇടപാടുകാരന്‍ കഞ്ചാവുമായി വീണ്ടും എക്‌സൈസിന്റെ പിടിയിലായി. മഞ്ചേരി കുറുവമ്പ്രം ചേരണി സ്വദേശി കറുവത്തില്‍ മൊയ്തീന്‍കുട്ടി (56) യാണ് 2.2 കിലോ കഞ്ചാവുമായി പിടിയിലായത്. കമ്പം, തേനി ഭാഗങ്ങളില്‍നിന്ന് കഞ്ചാവ് കൊണ്ടുവന്ന് പെരിന്തല്‍മണ്ണയിലെ ചില്ലറ വില്‍പനക്കാര്‍ക്ക് എത്തിക്കുകയാണ് മൊയ്തീന്‍കുട്ടി ചെയ്തിരുന്നത്. ഒരുകിലോ കഞ്ചാവ് 15,000 രൂപ നിരക്കില്‍ വാങ്ങി 30,000 രൂപയ്ക്കാണ് പ്രതി ചെറുകിട കച്ചവടക്കാര്‍ക്ക് വില്‍പ്പന നടത്തിയിരുന്നത്.

എക്‌സൈസ് ഇന്‍സ്‌പെക്ടര്‍ എസ് അനിര്‍ഷയും സംഘവും പെരിന്തല്‍മണ്ണ കെഎസ്ആര്‍ടിസി ഡിപ്പോയില്‍നിന്നാണ് മൊയ്തീന്‍കുട്ടിയെ എക്‌സൈസ് സംഘം പിടികൂടിയത്. പ്രിവന്റീവ് ഓഫിസര്‍മാരായ യു കുഞ്ഞാലന്‍കുട്ടി, ഡി ഫ്രാന്‍സിസ്, സിവില്‍ എക്‌സൈസ് ഓഫിസര്‍മാരായ സായിറാം, ലെനിന്‍, മുഹമ്മദ് നൗഫല്‍, മുഹമ്മദ് ഷഫീഖ്, വനിതാ സിവില്‍ എക്‌സൈസ് ഓഫിസര്‍ സിന്ധു എന്നിവരും സംഘത്തിലുണ്ടായിരുന്നു. പ്രതിയെ കോടതിയില്‍ ഹാജരാക്കി റിമാന്റ് ചെയ്തു.