റിയല്‍ എസ്റ്റേറ്റ്: പണി നടക്കുന്ന പദ്ധതികള്‍ക്കും നിയമവ്യവസ്ഥകള്‍ ബാധകമെന്ന് റെറ

തിരുവനന്തപുരം: നിലവില്‍ പണി നടക്കുന്ന (Ongoing) റിയൽ എസ്റ്റേറ്റ് പദ്ധതികൾക്ക് റിയല്‍ എസ്റ്റേറ്റ് റെഗുലേറ്ററി അതോറിട്ടിയിൽ രജിസ്റ്റർ ചെയ്യാൻ മാർച്ച് 31 വരെ സമയമുണ്ടെങ്കിലും അതുവരെ റിയല്‍ എസ്റ്റേറ്റ് നിന്ത്രണ നിയമ വ്യവസ്ഥകള്‍ ബാധകമാക്കി റെറ. ഇതു സംബന്ധിച്ച ഉത്തരവ് ഇന്നലെയാണ് പുറത്തിറക്കിയത്.

രജിസ്റ്റര്‍ ചെയ്ത വില്‍പന കരാര്‍ ഇല്ലാതെ ഉപഭോക്താവില്‍ നിന്ന് പത്തു ശതമാനത്തിൽ കൂടുതൽ തുക മുൻകൂറായോ ആപ്ലിക്കേഷൻ ഫീസായോ വാങ്ങാൻ പാടില്ല. നിയമാനുസൃതമായ ഫോമില്‍ മാത്രമേ കരാര്‍ ഉണ്ടാക്കാന്‍ പാടുള്ളു. ഷെഡ്യൂള്‍ഡ് ബാങ്കിൽ ഓരോ പദ്ധതികൾക്കും പ്രത്യേകം അക്കൗണ്ട് തുടങ്ങുകയും മുന്‍കൂറായി വാങ്ങുന്ന തുകയുടെ 70 ശതമാനം അതത് അക്കൗണ്ടുകളിൽ നിക്ഷേപിക്കുകയും വേണം. എൻജിനീയർ, ആർക്കിടെക്ട്, ചാർട്ടേഡ് അക്കൗണ്ടന്റ് എന്നിവരുടെ നിയമാനുസൃത സര്‍ട്ടിഫിക്കറ്റുകള്‍ വാങ്ങിയതിനുശേഷം മാത്രമേ അതതു ഘട്ടത്തില്‍ ബാങ്കിൽ നിന്ന് തുക പിൻവലിക്കാവൂ എന്നും ഉത്തരവിൽ നിർദ്ദേശിച്ചിട്ടുണ്ട്.