സ്കൂളുകളില്‍ മൊബൈല്‍ ഫോണിനും സോഷ്യൽ മീഡിയകൾക്കും വിലക്ക്

തിരുവനന്തപുരം: സ്കൂളുകളില്‍ മൊബൈല്‍ ഫോണിന്റേയും സോഷ്യൽ മീഡിയകളുടെയും ഉപയോഗം വിലക്കി ഉത്തരവ്. പൊതുവിദ്യാഭ്യാസ ഡയറക്ടറാണ് ഉത്തരവിറക്കിയത്. സ്കൂൾ പ്രവൃത്തിസമയത്ത് അധ്യാപകര്‍ ഫോണും സമൂഹമാധ്യമങ്ങളും ഉപയോഗിക്കരുത്.

ഇതുസംബന്ധിച്ച് നേരത്തെ ഉത്തരവ് നല്‍കിയിട്ടും നടപ്പായിരുന്നില്ല. 2005 ജൂൺ 24 നാണ് വിദ്യാഭ്യാസ സ്ഥാപനങ്ങളിൽ മൊബൈൽ ഫോൺ ഉപയോഗം നിരോധിച്ചുകൊണ്ടുള്ള ഉത്തരവിറങ്ങിയത്. പ്രവൃത്തി സമയങ്ങളിൽ അധ്യാപകർ വ്യാപകമായി ഫോൺ ഉപയോഗിക്കുന്നതായി നിരന്തരം പരാതികൾ ഉയർന്ന പശ്ചാത്തലത്തിലാണ് വീണ്ടും ഉത്തരവിറക്കിയത്.