പിണറായി ഒന്നിനും കൊള്ളാത്തവന്‍; പോലിസിന്റെ തലപ്പത്ത് മോദി അനുയായികളെന്ന് കെ മുരളീധരന്‍

കോഴിക്കോട്: എല്ലാ നിയന്ത്രണവും പോലിസിനാണെങ്കില്‍ ആഭ്യന്തരമന്ത്രി കൂടിയായ മുഖ്യമന്ത്രി പിണറായി വിജയന്‍ ഒന്നിനും കൊള്ളാത്തവനാണെന്ന് കോണ്‍ഗ്രസ് നേതാവ് കെ മുരളീധരന്‍ എംപി. മാവോയിസ്റ്റ് ബന്ധം ആരോപിച്ച് യുഎപിഎ ചുമത്തി രണ്ട് യുവാക്കളെ അറസ്റ്റ് ചെയ്ത കേരളം ഇപ്പോള്‍ നാഥനില്ലാ കളരിയായി മാറിയിരിക്കുകയാണ്. എല്ലാ കുഴപ്പങ്ങള്‍ക്കും കാരണം പോലിസെന്നാണ് സര്‍ക്കാര്‍ വിശദീകരണം.

സിപിഎം പോലും പിണറായി വിജയനെ തള്ളിപ്പറയുന്ന അവസ്ഥയാണ്. യുഎപിഎ ചുമത്തി പോലിസ് അറസ്റ്റ് ചെയ്തവര്‍ ന്യൂനപക്ഷ വിഭാഗക്കാരാണ്. ന്യനപക്ഷങ്ങള്‍ക്ക് നരേന്ദ്രമോദി ഭരണത്തിലെന്ന പോലെ പിണറായിയുടെ ഭരണത്തിലും രക്ഷയില്ലെന്നും കെ മുരളീധരന്‍ ആരോപിച്ചു. കേരളത്തിന്റെ പോലിസ് തലപ്പത്ത് നരേന്ദ്രമോദിയുടെ അനുയായികളാണ്. അവര്‍ മോദിയുടെ നയം നടപ്പിലാക്കുന്നു. പിണറായി നോക്കി ഇരിക്കുന്നു. ആഭ്യന്തര വകുപ്പിന് മേല്‍ അധികാരം നഷ്ടപ്പെട്ട പിണറായി വിജയന്‍ സ്ഥാനമൊഴിയാന്‍ തയ്യാറാകുകയാണ് വേണ്ടതെന്നും കെ മുരളീധരന്‍ പറഞ്ഞു.