പൂന്തുറയില്‍ എസ്‌ഐയ്ക്ക് കൊവിഡ്; ഒപ്പമുണ്ടായിരുന്ന പോലിസുകാരോട് നിരീക്ഷണത്തില്‍ പോവാന്‍ നിര്‍ദേശം

തിരുവനന്തപുരം: പൂന്തുറയില്‍ ജൂനിയര്‍ എസ്‌ഐയ്ക്ക് കൊവിഡ് സ്ഥിരീകരിച്ചു. സൂപ്പര്‍ സ്‌പ്രെഡുണ്ടായ പൂന്തുറയില്‍ സ്ഥിതി ഗുരുതരമായി തുടരുന്നതിനിടെയാണ് ഡ്യൂട്ടിയിലുണ്ടായിരുന്ന പോലിസുകാരനും കൊവിഡ് സ്ഥിരീകരിച്ചത്. ഇയാള്‍ക്ക് രോഗം സ്ഥീകരിച്ചതോടെ ഒപ്പമുണ്ടായിരുന്ന പോലിസുകാരോട് നിരീക്ഷണത്തില്‍ പോവാന്‍ ആവശ്യപ്പെട്ടു. നാലാം തിയ്യതി ഇദ്ദേഹത്തിന്റെ സ്രവം പരിശോധനയ്ക്ക് നല്‍കിയിരുന്നു. ഇന്നലെ വൈകീട്ടോടെ പരിശോധനാഫലം വന്നു. നിരീക്ഷണത്തിലായിരുന്ന ഇദ്ദേഹത്തെ തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് മാറ്റി.

എസ്‌ഐയ്ക്ക് കൊവിഡ് സ്ഥിരീകരിച്ച സംഭവത്തില്‍ പോലിസിന് വീഴ്ചയുണ്ടായെ്‌നന ആക്ഷേപം ശക്തമാണ്. എസ്‌ഐയുടെ സാംപിളെടുത്തശേഷം ഇയാളെ ജോലിയില്‍ തുടരാന്‍ അനുവദിച്ചിരുന്നതായാണ് വിവരം. തിരുവനന്തപുരത്ത് ജോലിഭാരം കൂടുന്ന സാഹചര്യത്തില്‍ സമ്പര്‍ക്കപ്പട്ടികയില്‍ ഉളളവരെ പോലും നിര്‍ബന്ധിച്ച് ഡ്യൂട്ടിക്ക് കയറ്റുന്നുവെന്ന് നേരത്തെ തന്നെ പരാതി ഉയര്‍ന്നിരുന്നു. എആര്‍ ക്യാംപില്‍ ജോലിചെയ്യുന്ന പോലിസുകാരന് കൊവിഡ് സ്ഥിരീകരിച്ചപ്പോള്‍ ഇയാള്‍ക്കൊപ്പമുണ്ടായിരുന്നവരെ നിരീക്ഷണത്തില്‍ പോവാന്‍ അനുവദിച്ചില്ലെന്നായിരുന്നു പരാതി.