എറണാകുളം-അങ്കമാലി അതിരൂപതയിലെ ഭൂമി വില്‍പ്പനയിലെ സാമ്പത്തിക ഇടപാട്: മുന്‍ പ്രൊക്യുറേറ്റര്‍ ആയിരുന്ന വൈദികനെ ഇ ഡി ചോദ്യം ചെയ്തു

കൊച്ചി:സീറോ മലര്‍ബാര്‍ സഭയിലെ എറണാകുളം-അങ്കമാലി അതിരൂപതയിലെ വിവാദ ഭൂമി വില്‍പ്പനയിലെ സാമ്പത്തിക ഇടപാടുമായി ബന്ധപ്പെട്ട് മുന്‍ പ്രൊക്യുറേറ്റര്‍ ആയിരുന്ന വൈദികനെ എന്‍ഫോഴ്‌സ്‌മെന്റ് ഡയറക്ടറേറ്റ് ചോദ്യം ചെയ്തു.ഫാ. ജോഷി പുതുവയെയാണ് ഇ ഡിയുടെ കൊച്ചിയിലെ ഓഫിസിലേക്ക് വിളിച്ചു വരുത്തി ചോദ്യം ചെയ്തത്.

ഭുമി വില്‍പ്പനയിലെ സാമ്പത്തിക ഇടപാടില്‍ കള്ളപ്പണ ഇടപാട് നടന്നിട്ടുണ്ടോയെന്നാണ് ഇ ഡി അന്വേഷിക്കുന്നത്.ഇതിന്റെ ഭാഗമായിട്ടാണ് ഇപ്പോള്‍ മുന്‍പ്രൊക്യുറേറ്റര്‍ ഫാ. ജോഷി പുതുവയെ വിളിച്ചു വരുത്തി ചോദ്യം ചെയ്തത്.ഫാ.ജോഷി പുതുവയെക്കൂടാതെ ഫാ. സെബാസ്റ്റ്യന്‍ വടക്കും പാടത്തെയും ഇ ഡി ചോദ്യം ചെയ്യാന്‍ വിളിപ്പിച്ചിട്ടുണ്ടെന്നാണ് വിവരം.

ഭൂമി വാങ്ങിയവരെയും ഇടനിലക്കാരെയും വരും ദിവസങ്ങളില്‍ ഇ ഡി ചോദ്യം ചെയ്യുമെന്നാണ് വിവരം.