ഇരുനൂറിലധികം കോഴികളെ തെരുവ്‌നായ്ക്കള്‍ കടിച്ചുകൊന്നു

കല്ലമ്പലം: പുല്ലൂര്‍മുക്കില്‍ കോഴിഫാമില്‍ കയറി തെരുവുനായ്ക്കള്‍ ഇരുന്നൂറിലധികം മുട്ടക്കോഴികളെ കടിച്ചുകൊന്നു. കല്ലമ്പലം പുല്ലൂര്‍മുക്ക് പ്ലാവിള വീട്ടില്‍ സീനത്തിന്റെ ഉടമസ്ഥതയിലുള്ള ഫാമിലെ കോഴികളെയാണ് കടിച്ചുകൊന്നത്.

ആറിലധികം വരുന്ന തെരുവുനായ്ക്കളാണ് കോഴികളെ ആക്രമിച്ചത്. ഇരുമ്പുവലകൊണ്ടു നിര്‍മിച്ച കൂട് കടിച്ചുകീറിയാണ് നായ്ക്കള്‍ ഉള്ളില്‍ക്കടന്നത്. കോഴികളുടെ കരച്ചില്‍ കേട്ട് ഓടിയെത്തിയ ഉടമ നായ്ക്കളെ ഓടിച്ചുവിട്ടു.

കൂടിനുള്ളില്‍നിന്ന് ഒരു കോഴിയെപ്പോലും ജീവനോടെ കിട്ടിയില്ല. നാല്‍പ്പതിനായിരം രൂപയുടെ നഷ്ടം കണക്കാക്കുന്നതായി ഉടമ പറഞ്ഞു.