മുഖ്യമന്ത്രി വസന്തകുമാറിന്റെ വീട് സന്ദര്‍ശിച്ചു

കല്‍പ്പറ്റ: കശ്മീരിലെ പുല്‍വാമയിലുണ്ടായ ആക്രമണത്തില്‍ കൊല്ലപ്പെട്ട സൈനികന്‍ വി വി വസന്തകുമാറിന്റെ വീട് മുഖ്യമന്ത്രി പിണറായി വിജയന്‍ സന്ദര്‍ശിച്ചു. രാവിലെ ഒമ്പതുമണിക്ക് വയനാട് മുക്കംകുന്നിലെ വസന്തകുമാറിന്റെ വീട്ടിലെത്തിയ മുഖ്യമന്ത്രിക്കൊപ്പം മന്ത്രിമാരായ ഇ പി ജയരാജന്‍, രാമചന്ദ്രന്‍ കടന്നപ്പള്ളി തുടങ്ങിയവരുമുണ്ടായിരുന്നു.

വസന്തകുമാറിന്റെ കുടുംബത്തിനായി എല്ലാ സഹായങ്ങളും പിന്തുണയും നല്‍കുമെന്ന് മുഖ്യമന്ത്രി പറഞ്ഞു. നിലവില്‍ വെറ്ററിനറി സര്‍വകലാശാലയില്‍ താല്‍ക്കാലിക ജോലി ചെയ്യുന്ന വസന്തകുമാറിന്റെ ഭാര്യയ്ക്ക് ആ ജോലി സ്ഥിരപ്പെടുത്തി കൊടുക്കുകയും താല്‍പര്യമില്ലങ്കില്‍ പോലിസില്‍ സബ് ഇന്‍സ്‌പെക്ടറായി നിയമനം നല്‍കാമെന്നും മുഖ്യമന്ത്രി അറിയിച്ചു. വസന്തകുമാറിന്റെ കുടുംബത്തിന് സംസ്ഥാന സര്‍ക്കാര്‍ 25 ലക്ഷം രൂപ ധനസഹായം നല്‍കുമെന്ന് നേരത്തെ പ്രഖ്യാപിച്ചിരുന്നു.