ഇനി ചികില്‍സ വൈകില്ല; ഇശല്‍ മറിയത്തിനും കാസിമിനും മാട്ടൂല്‍ മുഹമ്മദ് ചികില്‍സാ ഫണ്ടില്‍നിന്ന് 8.5 കോടി വീതം നല്‍കും

കണ്ണൂര്‍: അപൂര്‍വരോഗം ബാധിച്ച ലക്ഷദ്വീപ് സ്വദേശി ഇശല്‍ മറിയത്തിന്റെയും ചപ്പാരപ്പടവ് സ്വദേശി മുഹമ്മദ് കാസിമിന്റെയും ചികില്‍സയ്ക്ക് വഴിയൊരുങ്ങുന്നു. സ്‌പൈനല്‍ മസ്‌കുലര്‍ അട്രോഫി (എസ്എംഎ) രോഗം ബാധിച്ച ഇരുവരുടെയും ചികില്‍സയ്ക്കായി കണ്ണൂര്‍ മാട്ടൂലിലെ മുഹമ്മദിന്റെ ചികില്‍സാ ഫണ്ടില്‍നിന്ന് 8.5 കോടി വീതം നല്‍കും. മുഹമ്മദ് ചികില്‍സാ കമ്മിറ്റിയാണ് ഇക്കാര്യം വാര്‍ത്താക്കുറിപ്പിലൂടെ അറിയിച്ചത്. മുഹമ്മദിന്റെയും സഹോദരി അഫ്രയുടെയും ചികില്‍സയ്ക്ക് പ്രതീക്ഷിക്കുന്ന തുക കഴിഞ്ഞ് ബാക്കിയുള്ളത് സ്‌പൈനല്‍ മസ്‌കുലാര്‍ അട്രോപ്പി ബാധിച്ച മറ്റുള്ളവര്‍ക്ക് നല്‍കാന്‍ മുഹമ്മദ് ചികില്‍സാ കമ്മിറ്റി തീരുമാനിച്ചിരുന്നു. ഇതിന്റെ ഭാഗമായാണ് ഇശല്‍ മറിയം, കാസിം എന്നിവര്‍ക്ക് ആവശ്യമായ തുക നല്‍കാന്‍ തീരുമാനിച്ചത്.

സര്‍ക്കാര്‍ മുഖേന ഈ തുക കൈമാറാനായിരുന്നു തീരുമാനിച്ചിരുന്നത്. എന്നാല്‍, സര്‍ക്കാര്‍ വഴി നല്‍കുമ്പോള്‍ കാലതാമസം നേരിടുമെന്നതിനാല്‍ ഇരുവരുടെയും ചികില്‍സാ കമ്മിറ്റികള്‍ക്ക് 8.5 കോടി രൂപ വീതം നേരിട്ട് കൈമാറാന്‍ തീരുമാനിക്കുകയായിരുന്നുവെന്ന് മുഹമ്മദ് ചികില്‍സാ കമ്മിറ്റി ചെയര്‍പേഴ്‌സന്‍ ഫാരിഷ ടീച്ചറും ജനറല്‍ കണ്‍വീനര്‍ ടിപി അബ്ബാസ് ഹാജിയും വാര്‍ത്താക്കുറിപ്പില്‍ അറിയിച്ചു. കണ്ണൂര്‍ മാട്ടൂല്‍ സ്വദേശികളായ റഫീഖിന്റെയും മറിയുമ്മയുടെയും മകനാണ് മുഹമ്മദ്. സമൂഹമാധ്യമങ്ങളിലൂടെ പ്രചരിച്ച വാര്‍ത്തയോട് കേരളം ഒറ്റക്കെട്ടായി കൈകോര്‍ത്തു. പ്രമുഖരെല്ലാം മുഹമ്മദിന്റെ വാര്‍ത്ത സമൂഹമാധ്യമങ്ങളില്‍ പങ്കുവച്ചു.

ഫേയ്‌സ്ബുക്കിലൂടേയും വാട്‌സാപ്പിലൂടേയും കുഞ്ഞുമുഹമ്മദിന്റെ ജീവന്‍ നിലനിര്‍ത്താന്‍ കേരളത്തിന്റെ സഹായം വേണമെന്ന വാര്‍ത്ത പ്രചരിച്ചതോടെ മൂന്നുദിവസങ്ങള്‍ക്കുള്ളില്‍ത്തന്നെ 18 കോടി രൂപ ലഭിച്ചിരുന്നു. എന്നാല്‍, സുമനസ്സുകള്‍ ഒരുമിച്ചപ്പോള്‍ എസ്എംഎ ബാധിച്ച മുഹമ്മദിന്റെ ചികില്‍സയ്ക്കായി ആരംഭിച്ച ധനസമാഹരണത്തിലേക്ക് ദിവസങ്ങള്‍ കൊണ്ട് 46.78 കോടി രൂപയാണ് ഒഴുകിയെത്തിയത്. മുഹമ്മദിന്റെ ചികില്‍സയ്ക്ക് 18 കോടി രൂപ മാത്രമാണ് വേണ്ടിയിരുന്നത്. അപൂര്‍വരോഗം ചികില്‍സിക്കാന്‍ സോള്‍ജെന്‍സ്മ എന്ന മരുന്നാണ് വേണ്ടത്.

വിദേശത്തുനിന്ന് ഇറക്കുമതി ചെയ്യുന്ന ഈ മരുന്ന് ഒരു ഡോസിന് 18 കോടി രൂപയാണ്. ജനിതകവൈകല്യം മൂലം ഉണ്ടാകുന്ന രോഗമാണ് സ്‌പൈനല്‍ മസ്‌കുലര്‍ അട്രോഫി. പതിനായിരം കുഞ്ഞുങ്ങളില്‍ ഒരാള്‍ എന്ന അനുപാതത്തിലാണ് സാധാരണ രോഗബാധ. ഞരമ്പുകളിലെ തകരാറുകാരണം പേശികള്‍ ചലനശേഷിയില്ലാതാവുകയും പിന്നീട് അസ്ഥികളെ രോഗം ബാധിക്കുകയും ചെയ്യും.