ടിഡിപി നേതാവ് ഗാന്‍ഗുല പ്രതാപ് റെഡ്ഡി ബിജെപിയില്‍

ന്യൂഡല്‍ഹി: തെലുങ്കുദേശം പാര്‍ട്ടി (ടിഡിപി) നേതാവ് ഗാന്‍ഗുല പ്രതാപ് റെഡ്ഡി ബിജെപിയില്‍ ചേര്‍ന്നു. ബിജെപി വര്‍ക്കിങ് പ്രസിഡന്റ് ജെ പി നദ്ദയുടെ സാന്നിധ്യത്തിലായിരുന്നു പ്രതാപ് റെഡ്ഡിയുടെ പാര്‍ട്ടി പ്രവേശനം. ബിജെപിയെയും അതിന്റെ പ്രത്യയശാസ്ത്രത്തെയും റെഡ്ഡിക്ക് പരിചിതമാണെന്ന് ബിജെപി ജനറല്‍ സെക്രട്ടറി പി മുരളീധര്‍റാവു പറഞ്ഞു. ഹ്രസ്വകാലത്തേക്ക് അദ്ദേഹം ബിജെപിയിലുണ്ടായിരുന്നു. പാര്‍ട്ടി അദ്ദേഹത്തിന് പുതിയതല്ല. ബിജെപിയുടെ ഭാഗമാവാനുള്ള ആഗ്രഹം അദ്ദേഹം പ്രകടിപ്പിച്ചു. നമ്മുടെ പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ അദ്ദേഹത്തിന് മതിപ്പുണ്ട്. അദ്ദേഹത്തിന്റെ കഴിവുകള്‍ തങ്ങള്‍ക്ക് പ്രയോജനപ്പെടുത്താന്‍ കഴിയുമെന്നാണ് വിശ്വാസം.

ബഹുജനനേതാവായ അദ്ദേഹത്തെ ആന്ധ്രാപ്രദേശില്‍ നിയോഗിക്കാനാണ് ആലോചിക്കുന്നത്. ഇനിയും നിരവധി നേതാക്കള്‍ തങ്ങളോടൊപ്പം ചേരുമെന്നും റാവു കൂട്ടിച്ചേര്‍ത്തു. 2000 ല്‍ ബിജെപിയില്‍ ചേര്‍ന്ന റെഡ്ഡി പാര്‍ട്ടിയുടെ ദേശീയ കൗണ്‍സില്‍ അംഗമായിരുന്നു. 1992 മുതല്‍ 1998 വരെ റെഡ്ഡി രാജ്യസഭാംഗമായും പ്രവര്‍ത്തിച്ചു. വിവരസാങ്കേതികം, ടൂറിസം, ഗതാഗതം തുടങ്ങിയ വിവിധ കമ്മിറ്റികളില്‍ സേവനമനുഷ്ഠിച്ചിട്ടുണ്ട്. അതേസമയം, ബിജെപിയുടെ ദേശീയതയും വികസനപ്രവര്‍ത്തനങ്ങളുമാണ് തന്നെ പാര്‍ട്ടിയിലേക്ക് ആകര്‍ഷിച്ചതെന്ന് റെഡ്ഡി പ്രതികരിച്ചു. രാജ്യത്തെ നയിക്കുന്ന പ്രധാനമന്ത്രി നരേന്ദ്രമോദിക്ക് മികച്ച പ്രതിച്ഛായയാണുള്ളത്. അഴിമതികള്‍ രാജ്യത്ത് കുറഞ്ഞുവെന്നും പ്രതാപ് റെഡ്ഡി കൂട്ടിച്ചേര്‍ത്തു.