ബോളിവുഡ് സെലിബ്രിറ്റികളില്‍ ചിലര്‍ക്ക് ഐഎസ്‌ഐ ബന്ധമുണ്ടെന്ന് ബിജെപി നേതാവ്

ന്യൂഡല്‍ഹി: ബോളിവുഡിലെ ചില സെലിബ്രിറ്റികള്‍ക്ക് പാക് ചാരസംഘടനയായ ഐസ്‌ഐയുമായി ബന്ധമുണ്ടെന്ന ആരോപണവുമായി ബിജെപി നേതാവ്. പാര്‍ട്ടി ദേശീയ വൈസ്പ്രസിഡന്റും വക്താവുമായ ബൈജയന്ത് ജയ് പാണ്ഡയാണ് ആരോപണവുമായി രംഗത്ത് വന്നത്.

തന്റെ വാദങ്ങള്‍ തെളിയിക്കാന്‍ തക്ക തെളിവുകള്‍ കൈവശമുണ്ടെന്നും ബൈജയന്ത് ജയ പാണ്ഡ അവകാശപ്പെട്ടു. എന്നാല്‍ ആരെയും പേരെടുത്ത് പരാമര്‍ശിക്കാന്‍ ഇദ്ദേഹം തയ്യാറായില്ല. ബോളിവുഡിലെ ദേശസ്‌നേഹികള്‍ ഇത്തരക്കാരെ കരുതിയിരിക്കണമെന്നും ബൈജയന്ത് പാണ്ഡ ആവശ്യപ്പെട്ടു.

Came across shocking threads documenting personal & business links of some Bollywood personalities with certain Pakistanis & NRIs with undeniable track record encouraging violence in J&K, who have verifiable links to ISI & Pak army. I urge patriotic Bollywoodies to renounce them.

— Baijayant Jay Panda (@PandaJay) July 22, 2020

ജമ്മുകശ്മീരില്‍ കലാപം ഉണ്ടാക്കുന്നതില്‍ പങ്കുണ്ടെന്ന് കണക്കാക്കുന്ന ചില പാകിസ്താനികളുമായും എന്‍ആര്‍ഐകളുമായും ബോളിവുഡിലെ ചിലര്‍ക്ക് വ്യക്തിബന്ധങ്ങളും ബിസിനസ് ബന്ധങ്ങളുമുണ്ടെന്നതിന് തെളിവുകളുണ്ടെന്ന് ഇദ്ദേഹം പറഞ്ഞു. ഇവര്‍ക്ക് ഐഎസ്‌ഐയുമായും പാക് സൈന്യവുമായും ബന്ധമുണ്ട്. ഇവരെ അവഗണിക്കാന്‍ ബോളിവുഡിലെ ദേശസ്‌നേഹികളായ ആളുകള്‍ തയ്യാറാകണമെന്നും ബൈജയന്ത് ട്വീറ്റ് ചെയ്തു.