ഡൽഹി പോലിസ് കമ്മീഷണറായി രാകേഷ് അസ്താനയെ നിയമിച്ച കേന്ദ്ര നടപടി വിവാദത്തിൽ

ന്യൂഡൽഹി: ഡൽഹി പോലിസ് കമ്മീഷണറായി രാകേഷ് അസ്താനയെ നിയമിച്ച കേന്ദ്ര നടപടി വിവാദമായി. വിഷയം ഡൽഹി നിയമസഭയിൽ ചർച്ച ചെയ്യാൻ ആം ആദ്മി പാർട്ടി തീരുമാനിച്ചു. നാളെ ഡൽഹി നിയമസഭയിൽ ഇതിന്മേൽ ചർച്ച നടക്കും.

രാകേഷ് അസ്താനയെ നിയമിച്ച നടപടിയെ വിമർശിച്ച് കോൺഗ്രസ് രംഗത്തെത്തിയിട്ടുണ്ട്. വിരമിക്കാൻ ദിവസങ്ങൾ മാത്രം നിലനിൽക്കെ അസ്താനയെ കമ്മീഷണറായി നിയമിക്കുകയും പിന്നീട് കാലാവധി നീട്ടി നൽകുകയും ചെയ്തത് സുപ്രിംകോടതി ഉത്തരവിൻ്റെ ലംഘനമാണെന്ന വാദമാണ് ഇരു പാർട്ടികളും ഉയർത്തുന്നത്. ഗുജറാത്ത് കേഡർ ഐപിഎസ് ഓഫീസറായ അസ്താനയെ കേന്ദ്ര കേഡറിൻ്റെ കീഴിൽ വരുന്ന ഡൽഹി പോലിസിൽ നിയമിച്ചതിനെതിരേ പോലിസിനകത്ത് അമർഷമുണ്ടെന്നാണ് റിപോർട്ടുകൾ.

വിരമിക്കാൻ മൂന്നു ദിവസം ബാക്കി നിൽക്കേയാണ് പോലിസ് കമ്മിഷണറായി നിയമിച്ചത്. 2019 ജനുവരിയിൽ സിബിഐ സ്പെഷൽ ഡയറക്ടറായിരിക്കേ അന്നത്തെ മേധാവി അലോക് വർമ്മയുമായി കൊമ്പ് കോർത്തതു വിവാദമായി. അസ്താനയെ സ്പെഷൽ ഡയറക്ടറായി നിയമിച്ചത് അലോക് വർമ എതിർത്തിരുന്നു. തുടർന്ന് വർമയ്ക്കൊപ്പം സി ബി ഐ യിൽ നിന്നു പുറത്തുപോയ അസ്താനയെ നാർക്കോട്ടിക്സ് കൺട്രോൾ ബ്യൂറോ ഡയറക്ടർ ജനറലായി നിയമിച്ചു. പ്രധാനമന്ത്രി നരേന്ദ്രമോദിയുമായും ആഭ്യന്തരമന്ത്രി അമിത് ഷായുമായും അടുത്ത ബന്ധമാണ് അസ്താനയ്ക്കുള്ളത്.