ഇന്ധന പ്രതിസന്ധി; പെട്രോളിയം മന്ത്രിയുമായി കൂടിക്കാഴ്ച നടത്തി പ്രധാനമന്ത്രി

ന്യൂഡല്‍ഹി: ഇറാനെതിരായ യുഎസ്-ഇസ്രായേല്‍ ആക്രമണത്തിന്റെ പശ്ചാത്തലത്തില്‍ എല്‍പിജി ക്ഷാമം പരിഹരിക്കുന്നതിനായി പ്രധാനമന്ത്രി നരേന്ദ്ര മോദി ഇന്ന് പെട്രോളിയം മന്ത്രി ഹര്‍ദീപ് സിങ് പുരിയുമായും വിദേശകാര്യ മന്ത്രി എസ് ജയ്ശങ്കറുമായും കൂടിക്കാഴ്ച നടത്തി. അമേരിക്കയും ഇസ്രായേലും ഇറാനിലേക്ക് നടത്തിയ സൈനിക നടപടികളെ തുടര്‍ന്ന് ഹോര്‍മുസ് കടലിടുക്ക് അടച്ചതാണ് നിലവിലെ പ്രതിസന്ധിക്ക് കാരണം.

ഇന്ത്യയുടെ മൊത്തം എല്‍പിജി ആവശ്യകതയുടെ 62 ശതമാനവും ഇറക്കുമതി ചെയ്യുന്നതുകൊണ്ട് ഹോര്‍മുസ് കടലിടുക്ക് രാജ്യത്തിന്റെ ഊര്‍ജ്ജ സുരക്ഷയ്ക്ക് വളരെ വേണ്ടപ്പെട്ടതാണ്. പ്രത്യേകിച്ചും, സൗദി അറേബ്യ പോലുള്ള രാജ്യങ്ങളില്‍ നിന്നുള്ള ഇറക്കുമതിയുടെ 85 ശതമാനം മുതല്‍ 90 ശതമാനം വരെ ഈ കടലിടുക്ക് വഴിയാണ് കടന്നുപോകുന്നത്. ഇന്ത്യ പ്രതിവര്‍ഷം ഏകദേശം 31.3 ദശലക്ഷം ടണ്‍ എല്‍പിജി ഉപയോഗിക്കുന്നുണ്ട്.