തമിഴ്നാട്ടില്‍ ഇനി 'രോഗികള്‍' ഇല്ല, പകരം 'മെഡിക്കല്‍ ഉപഭോക്താക്കള്‍';- ഉത്തരവ്

ചെന്നൈ: തമിഴ്‌നാട്ടില്‍ ആശുപത്രികളിലും ആരോഗ്യ കേന്ദ്രങ്ങളിലും സേവനങ്ങള്‍ തേടിയെത്തുന്നവരെ 'രോഗികള്‍' എന്ന് വിളിക്കരുത് പകരം 'മെഡിക്കല്‍ ഉപഭോക്താക്കള്‍' എന്ന് വിളിക്കണം. ഇന്നലെയാണ് ഇതുസംബന്ധിച്ച് തമിഴ്‌നാട് ആരോഗ്യ വകുപ്പ് ഉത്തരവിറക്കിയത്. ആരോഗ്യമന്ത്രി ഇക്കാര്യം വ്യക്തമാക്കുകയും ചെയ്തു.

ഇതുമായി ബന്ധപ്പെട്ട് ആരോഗ്യ-കുടുംബക്ഷേമ വകുപ്പ് സെക്രട്ടറി പുറത്തിറക്കിയ ഉത്തരവില്‍ പറയുന്നതിങ്ങനെ: 'ആശുപത്രികളിലും ആരോഗ്യ കേന്ദ്രങ്ങളിലും സേവനങ്ങള്‍ തേടി വരുന്നവരെ 'രോഗികള്‍' എന്നല്ല 'മെഡിക്കല്‍ ഉപഭോക്താക്കള്‍' എന്നുവേണം ഇനി മുതല്‍ വിളിക്കാന്‍'

വൈദ്യശാസ്ത്രം മാനുഷികമായ സേവനമായതിനാലാണ് 'രോഗി' എന്ന വാക്ക് വേണ്ടെന്നുള്ള സംസ്ഥാന സര്‍ക്കാരിന്റെ ഉത്തരവിന് കാരണം. തമിഴ്‌നാട്ടില്‍ ഉടനീളമുള്ള സര്‍ക്കാര്‍, സ്വകാര്യ ആശുപത്രികളില്‍ ഈ ഉത്തരവ് നടപ്പിലാക്കണമെന്ന് സര്‍ക്കാര്‍ നിര്‍ദേശം നല്‍കി. മുഖ്യമന്ത്രി എം കെ സ്റ്റാലിന്റെ പ്രത്യേക നിര്‍ദേശപ്രകാരമാണ് ഇത്തരമൊരു തീരുമാനമെടുത്തിരിക്കുന്നത്. സംസ്ഥാനത്തെ ആരോഗ്യ പൊതുജന ക്ഷേമ സെക്രട്ടറിയാണ് ഉത്തരവ് പുറപ്പെടുവിച്ചിരിക്കുന്നത്. ഇന്ന് വൈകിട്ട് മുതല്‍ ഈ ഉത്തരവ് നടപ്പിലായിത്തുടങ്ങി.