പുതിയ മുല്ലപ്പെരിയാര്‍ അണക്കെട്ട്; കേരളത്തിനും തമിഴ്നാടിനും ദുരന്ത നിവാരണ അതോറിറ്റിക്കും നോട്ടീസ് അയച്ച് സുപ്രിം കോടതി

ന്യൂഡല്‍ഹി: മുല്ലപ്പെരിയാര്‍ അണക്കെട്ടിന്റെ സുരക്ഷ സംബന്ധിച്ച് സുപ്രീം കോടതി കേന്ദ്രത്തിനും ദേശീയ ദുരന്ത നിവാരണ അതോറിറ്റിക്കും നോട്ടീസ് അയച്ചു. 130 വര്‍ഷം പഴക്കമുള്ള മുല്ലപ്പെരിയാര്‍ അണക്കെട്ടിന്റെ സുരക്ഷയും ഘടനാപരമായ സ്ഥിരതയും സംബന്ധിച്ച് ആശങ്കകള്‍ ഉയര്‍ന്നതിനെ തുടര്‍ന്ന് പുതിയ അണക്കെട്ട് നിര്‍മ്മിക്കണമെന്ന് ആവശ്യവുമായി സമര്‍പ്പിച്ച പൊതുതാല്‍പ്പര്യ ഹര്‍ജിയില്‍, സുപ്രീം കോടതി കേന്ദ്രത്തിനും തമിഴ്നാട്, കേരള സര്‍ക്കാരുകള്‍ക്കും ദേശീയ ദുരന്ത നിവാരണ അതോറിറ്റിക്കുമാണ് നോട്ടീസ് അയച്ചത്.

ബ്രിട്ടീഷ് കാലഘട്ടത്തിലെ അണക്കെട്ടിന് സമീപം 10 ദശലക്ഷത്തിലധികം ആളുകള്‍ താമസിക്കുന്നുണ്ടെന്ന് ആരോപിച്ച് സേവ് കേരള ബ്രിഗേഡ് സമര്‍പ്പിച്ച ഹരജി ചീഫ് ജസ്റ്റിസ് ബി ആര്‍ ഗവായി, ജസ്റ്റിസ് കെ വിനോദ് ചന്ദ്രന്‍ എന്നിവരടങ്ങിയ ബെഞ്ച് പരിഗണിക്കുകയായിരുന്നു. കേന്ദ്രസര്‍ക്കാര്‍, തമിഴ്നാട്, കേരള സര്‍ക്കാരുകള്‍, ദേശീയ ദുരന്ത നിവാരണ അതോറിറ്റി എന്നിവരെ പൊതുതാല്‍പര്യ ഹരജിയില്‍ ഉള്‍പ്പെടുത്തിയിട്ടുണ്ട്.

'നിലവിലുള്ള അണക്കെട്ട് ശക്തിപ്പെടുത്തുന്നതിന് ചില നിര്‍ദേശങ്ങള്‍ ആവശ്യമായി വന്നേക്കാം,' ചീഫ് ജസ്റ്റിസ് പറഞ്ഞു. സുരക്ഷാ വശങ്ങളും പുതിയ ഘടന നിര്‍മിക്കുന്നതിനുള്ള സാധ്യതകളും വിലയിരുത്തുന്നതിനായി വിദഗ്ധസമിതി ഈ വിഷയം പരിശോധിക്കണമെന്നും കോടതി നിര്‍ദേശിച്ചു.പഴയ അണക്കെട്ടിന് സമീപത്തുള്ള താഴ്ന്ന പ്രദേശങ്ങളില്‍ താമസിക്കുന്ന ഏകദേശം 10 ദശലക്ഷം ജനങ്ങളുടെ ജീവനും സ്വത്തിനും ഗുരുതരമായ ഭീഷണി ഉയര്‍ത്തുന്നുണ്ടെന്നും പൊതുജന സുരക്ഷ ഉറപ്പാക്കാന്‍ പുതിയ അണക്കെട്ട് നിര്‍മിക്കാന്‍ കോടതി നിര്‍ദ്ദേശിക്കണമെന്നും ഹരജിക്കാരന് വേണ്ടി ഹാജരായ മുതിര്‍ന്ന അഭിഭാഷകന്‍ വി ഗിരി വാദിച്ചു.