'മുസ് ലിങ്ങള്‍ ഇന്ത്യയെ പാകിസ്താനാക്കുന്നു, ഹിന്ദുക്കള്‍ നാല് കുട്ടികളെ പ്രസവിക്കണം': വിവാദ പരാമര്‍ശവുമായി ബിജെപിയുടെ നവനീത് റാണ

'അമരാവതി: ഇന്ത്യയെ പാകിസ്താനാക്കി മാറ്റാനുള്ള പദ്ധതിയെ പ്രതിരോധിക്കാന്‍ ഹിന്ദുക്കള്‍ കുറഞ്ഞത് മൂന്നോ നാലോ കുട്ടികള്‍ക്ക് ജന്മം നല്‍കണമെന്ന് ബിജെപി നേതാവ് നവനീത് റാണ. ഇതോടെ വലിയ രാഷ്ട്രീയ വിവാദത്തിനാണ് നവനീത് റാണ തിരികൊളുത്തിയിരിക്കുന്നത്. 'നോക്കൂ, ഈ ആളുകള്‍ പരസ്യമായി പറയുകയാണ് അവര്‍ക്ക് നാല് ഭാര്യമാരും 19 കുട്ടികളുമുണ്ടെന്ന്. എല്ലാ ഹിന്ദുക്കളോടും ഞാന്‍ അഭ്യര്‍ഥിക്കുകയാണ്. നമ്മള്‍ കുറഞ്ഞത് മൂന്ന്, നാല് കുട്ടികളെയെങ്കിലും ജനിപ്പിക്കണമെന്ന് ഞാന്‍ പറയുന്നു. ഹിന്ദുസ്ഥാനെ പാകിസ്താന്‍ ആക്കി മാറ്റാനുള്ള പദ്ധതിയെ പ്രതിരോധിക്കാന്‍ ഹിന്ദുക്കള്‍ കുറഞ്ഞത് മൂന്നോ നാലോ കുട്ടികളെ ജനിപ്പിക്കണം', നവനീത് റാണ മാധ്യമപ്രവര്‍ത്തകരോട് പ്രതികരിച്ചു.

'അദ്ദേഹം ഒരു ഇസ്ലാം മത പണ്ഡിതനാണോ അതോ മറ്റാരെങ്കിലുമാണോ എന്ന് എനിക്കറിയില്ല. പക്ഷെ അദ്ദേഹത്തിന് 19 കുട്ടികളും നാല് ഭാര്യമാരുമുണ്ടെന്ന് അദ്ദേഹം പറഞ്ഞു. മുപ്പത് കുട്ടികള്‍ എന്ന ലക്ഷ്യം പൂര്‍ത്തിയാക്കാന്‍ അദ്ദേഹത്തിന് കഴിഞ്ഞില്ല. ധാരാളം കുട്ടികളെ ജനിപ്പിച്ചു കൊണ്ട് ഹിന്ദുസ്ഥാനെ പാകിസ്താനാക്കി മാറ്റാന്‍ അവര്‍ പദ്ധതിയിടുന്നു. അപ്പോള്‍ നമ്മള്‍ എന്തിന് ഒരു കുട്ടി കൊണ്ട് മാത്രം തൃപ്തിപ്പെടുന്നു? അതുകൊണ്ട് നമ്മള്‍ മൂന്നോ നാലോ കുട്ടികള്‍ക്ക് ജന്മം നല്‍കേണ്ടതുണ്ട്,' -റാണ കൂട്ടിച്ചേര്‍ത്തു.