മുംബൈയിലെ പവായ് ബന്ദി നാടകം; കൊല്ലപ്പെട്ട പ്രതി ഉന്നതര്‍ക്കെതിരേ അഴിമതി ആരോപണം ഉന്നയിച്ചയാള്‍

മുംബൈ: മുംബൈയിലെ പവായ് ബന്ദി നാടകം വന്‍ രാഷ്ട്രീയ വഴിത്തിരിവിലേക്കു നീങ്ങുന്നതായി സൂചന. കേസിലെ പ്രതിയായ രോഹിത് ആര്യ മുന്‍പ് പുണെയിലെ മുതിര്‍ന്ന ഉദ്യോഗസ്ഥര്‍, പോലിസ് ഉദ്യോഗസ്ഥര്‍, ഒരു മുന്‍ മന്ത്രി എന്നിവര്‍ക്കെതിരേ ഗുരുതരമായ അഴിമതി ആരോപണങ്ങള്‍ ഉന്നയിച്ചിരുന്നതായി ഉന്നത വൃത്തങ്ങള്‍ വെളിപ്പെടുത്തുന്നു. ബന്ദികളെ രക്ഷപെടുത്താനുള്ള ശ്രമത്തിനിടെ ഇയാളെ പൊലിസ് വെടിവച്ചു കൊല്ലുകയും ചെയ്തു.

റിപ്പോര്‍ട്ടുകള്‍ അനുസരിച്ച്, സര്‍ക്കാര്‍ സ്‌കൂള്‍ പദ്ധതി കരാറുമായി ബന്ധപ്പെട്ട് തനിക്ക് ലഭിക്കാനുള്ള ഏകദേശം രണ്ടു കോടിയോളം രൂപയുടെ കുടിശിക സംബന്ധിച്ച് രോഹിത് ആര്യ നിരവധി തവണ പ്രതിഷേധിക്കുകയും പരാതികള്‍ ഉന്നയിക്കുകയും ചെയ്തിരുന്നു.

മുന്‍പ് ബാങ്കറായും ഒരു കമ്പനിയുടെ ഡയറക്റ്ററായും പ്രവര്‍ത്തിച്ചിരുന്നയാളാണ് രോഹിത്. ഇയാള്‍ മാനസിക പ്രശ്‌നമുള്ളാളാണ് എന്നാണ് ബന്ദി നാടകത്തിന്റെ പ്രാഥമിക ഘട്ടത്തില്‍ പോലിസ് പറഞ്ഞിരുന്നത്. എന്നാല്‍, പുതിയ വെളിപ്പെടുത്തലുകളുടെ പശ്ചാത്തലത്തില്‍ ഈ വാദവും സംശയത്തിലായിരിക്കുകയാണ്. ആരോപണം നേരിട്ട പ്രമുഖരുടെ പേരുകള്‍ കാരണം കേസ് ഉന്നത തലങ്ങളിലേക്ക് എത്താന്‍ സാധ്യതയുണ്ട്.

മുംബൈയിലെ പവായ് ഏരിയയിലുള്ള ആര്‍.എ. സ്റ്റുഡിയോയില്‍ വച്ചാണ് ബന്ദി നാടകം അരങ്ങേറിയത്. ഒരു വെബ് സീരീസിന്റെ ഓഡിഷനായി വിളിച്ചുവരുത്തിയ 17 കുട്ടികളെയും മറ്റ് രണ്ടു പേരെയും രോഹിത് ആര്യ തോക്ക് ചൂണ്ടി ഭീഷണിപ്പെടുത്തി ബന്ദികളാക്കുകയായിരുന്നു. പണത്തിനോ മറ്റ് സാമ്പത്തിക കാര്യങ്ങള്‍ക്കോ വേണ്ടിയല്ല താന്‍ ഇത് ചെയ്യുന്നതെന്നും, ചില ഉന്നതരുമായി സംസാരിക്കുകയും ചോദ്യങ്ങള്‍ ചോദിക്കുകയും ചെയ്യണമെന്നുമായിരുന്നു ആര്യയുടെ ആവശ്യം.

തന്റെ ആവശ്യങ്ങള്‍ നിഷേധിക്കപ്പെട്ടാല്‍ കുട്ടികളെ ഉപദ്രവിക്കുമെന്നും കെട്ടിടത്തിന് തീയിടുമെന്നും ഇയാള്‍ സമൂഹ മാധ്യമങ്ങളിലൂടെ പുറത്തുവിട്ട വീഡിയോ സന്ദേശത്തില്‍ ഭീഷണി മുഴക്കിയിരുന്നു. പോലിസ് നടത്തിയ ഓപ്പറേഷനിലാണ് കുട്ടികളെ സുരക്ഷിതമായി രക്ഷപെടുത്തിയത്.