സംവിധായകനും തിരക്കഥാകൃത്തുമായ കെ ജി രാജശേഖരന്‍ അന്തരിച്ചു

ചെന്നൈ: ചലച്ചിത്ര സംവിധായകനും തിരക്കഥാകൃത്തുമായ കെ ജി രാജശേഖരന്‍ (72) അന്തരിച്ചു. ചെന്നൈയിലെ വസതിയിലായിരുന്നു അന്ത്യം. തിരയും തീരവും, പാഞ്ചജന്യം, പത്മതീര്‍ഥം, വെല്ലുവിളി, ഇന്ദ്രധനുസ്, യക്ഷിപ്പാറു, വാളെടുത്തവന്‍ വാളാല്‍, വിജയം നമ്മുടെ സേനാനി തുടങ്ങി മുപ്പതോളം സിനിമകള്‍ സംവിധാനം ചെയ്തിട്ടുണ്ട്.
1947 ഫെബ്രുവരി 12ന് വര്‍ക്കല ഇടവ കുരുനിലക്കോട് കടക്കാത്തുവീട്ടില്‍ ഗോവിന്ദക്കുറുപ്പിന്റെയും ജെ കമലാക്ഷിയമ്മയുടെയും മകനായി ജനനം. 1968ല്‍ മിടുമിടുക്കി എന്ന ചിത്രത്തിന്റെ അസിസ്റ്റന്റ് ഡയറക്ടറായാണ് രാജശേഖരന്‍ സിനിമാ മേഖലയിലേക്ക് പ്രവേശിക്കുന്നത്. അമ്പിളി രാജശേഖരനാണ് ഭാര്യ.