സില്‍ച്ചാര്‍- തിരുവനന്തപുരം എക്‌സ്പ്രസ്സില്‍ തീപ്പിടിത്തം

ദിസ്പൂര്‍: സില്‍ച്ചാര്‍- തിരുവനന്തപുരം എക്‌സ്പ്രസ് ട്രെയിനില്‍ തീപ്പിടിത്തം. അസമിലെ സില്‍ചാര്‍ റെയില്‍വേ സ്‌റ്റേഷനില്‍ വച്ച് ഇന്ന് രാവിലെയായിരുന്നു സംഭവം. ട്രെയിനിന്റെ മൂന്ന് കോച്ചുകളിലാണ് തീപ്പിടിത്തമുണ്ടായതെന്നാണ് റിപോര്‍ട്ട്. അപകടമുണ്ടായ ഉടന്‍ സ്റ്റേറ്റ് ഡിസാസ്റ്റര്‍ റെസ്‌പോണ്‍സ് ഫോഴ്‌സും ഫയര്‍ഫോഴ്‌സും സ്ഥലത്തെത്തി തീയണച്ചതിനാല്‍ വന്‍ ദുരന്തമൊഴിവായി.

തീപ്പിടിത്തമുണ്ടായശേഷം കോച്ചുകളില്‍നിന്ന് വലിയ തോതില്‍ പുക ഉയര്‍ന്നത് പരിഭ്രാന്തി പരത്തി. എന്നാല്‍, ആളപായമൊന്നും റിപോര്‍ട്ട് ചെയ്തിട്ടില്ലെന്ന് ദേശീയ വാര്‍ത്താ ഏജന്‍സികള്‍ റിപോര്‍ട്ട് ചെയ്യുന്നു. തീപ്പിടിത്തമുണ്ടാവാനുള്ള കാരണം വ്യക്തമല്ല.

ട്രെയിനിലെ ഭക്ഷണശാലയ്ക്ക് സമീപമുള്ള സ്ലീപ്പര്‍ ക്ലാസ് കോച്ചിലാണ് ആദ്യം തീപ്പിടിത്തമുണ്ടായത്. തുടര്‍ന്ന് സമീപത്തെ മറ്റ് രണ്ട് കോച്ചുകളിലേക്ക് തീ പടര്‍ന്നുപിടിക്കുകയായിന്നുവെന്നാണ് വിവരം.