രാഷ്ട്രപതിഭവനു സമീപം ഡ്രോണ്‍; രണ്ട് യുഎസ് പൗരന്‍മാര്‍ അറസ്റ്റില്‍

ന്യൂഡല്‍ഹി: രാഷ്ട്രപതിയുടെ ഔദ്യോഗികവസതിയായ രാഷ്ട്രപതിഭവന് സമീപം ഡ്രോണ്‍ പറത്തിയ സംഭവത്തില്‍ രണ്ടുപേര്‍ പിടിയിലായി. അമേരിക്കന്‍ പൗരന്‍മാരായ അച്ഛനും മകനുമാണ് അറസ്റ്റിലായത്. ഡല്‍ഹി പോലിസാണ് ഇരുവരെയും അറസ്റ്റ് ചെയ്തത്. ഇരുവരുടെയും പേരുവിവരങ്ങള്‍ പോലിസ് പുറത്തുവിട്ടിട്ടില്ല. സപ്തംബര്‍ 14നായിരുന്നു സംഭവം.

ഡ്രോണില്‍ ഘടിപ്പിച്ച വീഡിയോ കാമറയിലൂടെ പകര്‍ത്തിയ അതീവസുരക്ഷാമേഖലയായ സെന്‍ട്രല്‍ സെക്രട്ടേറിയറ്റിന്റെ കുറച്ച് ചിത്രങ്ങളും പോലിസ് കണ്ടെടുത്തു. ഡല്‍ഹിയില്‍ ഡ്രോണ്‍ പറത്തലിന് പോലിസ് നിരോധനമേര്‍പ്പെടുത്തിയിരുന്നു. ഡ്രാണ്‍ പറത്താനുണ്ടായ സാഹചര്യമെന്തായിരുന്നുവെന്ന് പോലിസ് വ്യക്തമാക്കിയിട്ടില്ല. ഇരുവരെയും ചോദ്യംചെയ്തുവരികയാണെന്നും വിശദമായ അന്വേഷണം നടത്തുമെന്നും ഡല്‍ഹി പോലിസ് അറിയിച്ചു.